मानिसमा आफ्नो स्वास्थ्य ठिक हुनका लागि क्रियाशीलता, व्यायाम र खेलकुदको अत्यन्त ठूलो महत्व हुन्छ । शरीर स्वस्थ भएन भने मानसिकता पनि स्वस्थ हुँदैन ।

खेलकुद र व्यायामले मानसिक मात्र होइन शारीरिक स्वास्थ्यलाई पनि तन्दुरुस्त राख्न महत्वपूर्ण भूमिका खेलेको हुन्छ । हाम्रो समयमा त्यति धेरै सुविधा थिएन । तर, अहिले व्यायाम र खेलकुदका धेरै सम्भावना र अवसरहरु प्राप्त छन् । त्यसको अधिकतम सदुपयोग गर्नुपर्छ ।

यौन र प्रेमलाई अत्यन्त रहस्यमयी विषय बनाइयो । यो रहस्यमय विषय नै होइन । यसलाई रहस्यमयी बनाउनुपर्ने कुनै कारण छैन । एक कोषिकाबाट बहुकोषिकामा जीवहरू प्रवेश गरेपछि नै प्रजननको विकास भयो ।

त्यसपछि मात्रै जीवहरूमा यौन चाहना र प्रेमको भावना सुरू भएको हो । यो विल्कुल स्वभाविक कुरा हो । मानवीय चेतना यत्रो विकसित हुँदा पनि हामीले यसलाई यस्तो रहस्यमयी बनायौँ ।

यौन चाहनालाई रहस्यमयी बनाउँदा विभिन्न प्रकारका विकृतिहरूको सृजना भयो । युवा उमेरमा आउने यौन चाहनालाई ठीक ढंगले अभिव्यक्त गर्न नसक्दा धेरै प्रकारका विकृतिहरू आइरहेका छन् ।

यौन र प्रेमलाई रहस्यमयी बनाउनु हुँदैन थियो । अनेक विकृति र कुण्ठा बोकेर हिँड्नुको सट्टा यसलाई सरल र वैज्ञानिक तरिकाले हल गर्नुपर्छ । त्यसका लागि पनि प्रेम र यौनलाई रहस्यमयी नबनाई खुला छाड्नुपर्छ । त्यसैले प्रेम र यौनका विषयलाई रहस्यमय बनाउनुको सट्टा खुल्ला ढंगले बुझ्ने, सिक्ने र अरुलाई पनि सिकाउने गर्नुपर्छ ।

बुझ्ने सिक्ने र जान्ने विषयलाई रहस्यमयी बनाएर राख्नु हुँदैन । जति मानिस वा प्राणी उन्नत हुँदै जान्छ त्यति नै प्रेमपूर्ण हुँदै जान्छ ।

पशुमा प्रेम नभई यौन चाहना मात्रै हुन्छ भने मानिसमा प्रेम र यौन दुवै हुन्छ । यौनको जगमा प्रेम फस्टाउँदै गएपछि महिला पुरूष तथा श्रीमान–श्रीमतिकबीचमा अत्यन्त प्रेमपूर्ण सम्बन्ध बन्छ र यौन त्यसैको एक ‘बेसिक पार्ट’ हो । यौनमा कुण्ठित भएर युवाहरुले ऊर्जा खर्च गर्न हुँदैन ।

(काठमाडौँको इन्द्रेणी फुडल्यान्डस्थित नयाँ शक्तिका युवाहरूद्वारा आयोजित कार्यक्रममा डा. भट्टराईले राखेको धारणाको सम्पादित अंश) नयाँ पत्रीका बाट