नवलपरासी, १८ पुस । नवलपरासीमा जिल्ला अनुगमन तथा मूल्याङ्कन समितिले अवैधरुपमा भइरहेको खोलाजन्य वस्तुको कारोबारलाई नियन्त्रण गर्ने अभियान चलाएको छ ।
केही साता अघि नवलपरासीको केरुङखोला आसपासका क्षेत्रबाट नियम विपरीत करिब रु १५ करोड बराबरको खोलाजन्य वस्तु ढुङ्गा, गिट्टी र बालुवा समितिको टोलीले नियन्त्रणमा लिएको थियो ।
नियम विपरीत हुँदै गएका कार्य तत्काल बन्द गरी जिल्लामा राजस्व सङ्कलन अभिवृद्धि गर्ने उद्देश्यले सो कार्य अघि बढाइएको समितिका सदस्य सचिव एवम् स्थानीय विकास अधिकारी जिवलाल भुसालले बताउनुभयो ।
सो क्रममा बरामद भएका खोलाजन्य वस्तु बोक्न प्रयोग भएका करिब २६ वटा टिपर र तीन वटा जेसीबी नियन्त्रणमा लिएर रु ६५ करोड लाख जरिवाना गरिएको छ । आव २०७१÷०७२ मा केरुङ खोलाबाट खोलाजन्य वस्तु ढुङ्गा, गिट्टी र बालुवा तोकिएको मात्रामा निकाल्नका लागि भनेर स्मृति निमार्ण सेवाले करिब रु पाँच करोडमा ठेक्का लिएको थियो । तर सो कम्पनीले नियम विपरीत लामो समयसम्म चुरे क्षेत्रमा उत्खनन गरी राखिएको करिब रु १५ करोड बराबरका खोलाजन्य वस्तु ढुङ्गा, गिट्टी र बालुवा समितिले सवारीसाधनसहित नियन्त्रणमा लिएको हो ।
नवलपरासीमा करिब एक दर्जन ठूला खोलानाला रहँदै आएका छन् । जसबाट जिल्ला विकास समितिले वार्षिकरुपमा करिब रु १० करोड बराबरको राजस्व सङ्कलन गर्ने गर्दछ ।