काठमाडौं । नायिका उषा खनाललाई आजकाल जाडोले असाध्यै सताएको छ । उनले जाडोबाट बच्नका लागि विभिन्न उपाय अपनाउने गरेकी छिन् । चिसोका कारण उनको मुखको छालाका साथै हातमा पनि बेलाबेला समस्या नदेखिन भने होइन । उनी यस विषयमा भन्छिन्, ‘जाडो याममा शरीरलाई अलिक धेरै ध्यान दिनुपर्छ । अन्यथा चिसोले छालामा समस्या आउन सक्छ ।’
जथाभावी मोस्च्युराइजर प्रयोग नगर्ने गरेकी नायिका उषाले भनिन्, ‘चिकित्सकहरूको सल्लाहविना मैले कुनै पनि लोशन प्रयोग गर्दिन ।’
विज्ञको सल्लाहविना औषधिहरू प्रयोग गर्दा छालामा असर पर्ने उनको भनाइ छ । उनले अरुलाई पनि चिकित्सकहरूको सल्लाहमा स्वास्थ्यको ख्याल राख्न आग्रह गरिन् ।
पछिल्लो समय ठूला फिल्ममा भन्दा म्युजिक भिडियोमा अलिक धेरै देखिने गरेकी नायिका उषाले भनिन्, ‘म्युजिक भिडियो प्रसस्त बनेका छन् । अफर आउँछन् । राम्रो गीतमा खेल्ने गरेकी छु ।’
लामो समय नयाँदिल्लीको बसाइपछि काठमाडौं आइपुगेकी नायिका उषाले भनिन्, ‘व्यक्तिगत कामले नयाँदिल्ली गएकी थिए । नयाँदिल्लीको बसाइका क्रममा बलिउडका केही फिल्म मेकरहरूसँग पनि भेट भयो । फिल्महरूका विषयमा कुराकानी भएको छ । हेरौं भविष्यमा के हुन्छ ।’
बलिउडका साना प्रोजेक्टका फिल्म खेल्नका लागि अफर आएको उनले बताइन् । हुन त भारतीय भोजपुरी फिल्महरूमा नायिकाको रुपमा काम गरिसकेकी उषालाई बलिउडको नसा पनि छ ।
चकलेटी हिरोइनको छवि बनाएकी नायिका उषाले अर्को नयाँ फिल्म खेल्ने तयारी पनि गरेकी छिन् । ‘नयाँ फिल्ममा खेल्नका लागि आन्तरिक तयारी भएको छ । कुराकानी चलिरहेको छ’, उनले भनिन्, ‘फिल्मका विषयमा छिट्टै टुङ्गो लाग्नेछ ।’
प्रतिक्रिया
सम्बन्धित खवर
