चितवन, २६ पुस । पृथ्वीनारायण शाहको जन्म जयन्ती तथा राष्ट्रिय एकता दिवसमा सार्वजनिक विदा दिन चौतर्फी दबाब परेपछि प्रधानमन्त्री पुष्पकमल दाहाल ‘प्रचण्ड’ले मुख खोलेका छन् ।

प्रधानमन्त्री दाहालले पुस २७ भोलि पृथ्वी जयन्तीमा सार्वजनिक विदा दिन आफू सकारात्मक रहेको तर, त्यसका लागि सबैको सहमति खोज्न प्रयास गरिरहेको प्रतिक्रिया दिएका हुन् ।

गृहजिल्ला चितवनमा आयोजित कार्यक्रममा बोल्दै उनले पृथ्वी जयन्तीमा विदा दिनेबारे दुईपटक मन्त्रिपरिषदमा पनि कुरा भएको र सबैसँग छलफल गरी सर्वमान्य बनाई विदा घोषणा गरिने जानकारी दिए । यसमा एक्लै निर्णय गर्न नमिल्ने प्रधानमन्त्रीको भनाई छ ।

‘नेपाल एकीकरणको श्रेय शाहलाई नै जान्छ’

प्रधानमन्त्री दाहालले नेपाल एकीकरणको श्रेय पृथ्वीनारायण शाहलाई नै जाने र शाहको भूमिकालाई आफूले सकारात्मक रुपमा लिएको बताए ।

‘नेपालको केन्द्रीकृत राज्य निर्माणमा पृथ्वीनारायणको योगदान छ । तर, उनले बनाएको राज्य एकात्मक र सामन्ती राज्य नै हो । पृथ्वीनारायणले भुरेटाकुरे राज्यहरुलाई केन्द्रीकृत गरेर बलियो राज्य बनाए, उसको अधिमूल्यन र अवमूल्यन दुवै गलत हुन्छ,’ प्रधानमन्त्रीले अगाडि भने- ‘पृथ्वीनारायण शाहले राज्य बिस्तार मात्रै गरे वा राष्ट्रिय एकताको पनि नेतृत्व गरे ? यो नेपाली राजनीतिमा अहिले पनि बहसकै विषय छ । यो बहसको निरुपणले मात्रै पृथ्वीनारायणबारे सही निष्कर्षमा पुग्न सकिन्छ ।’

दैनिक नेपाल बाट सभार