दमक नपाको ३५ करोड बजेट सार्वजनिक

दमक÷ दमक नगरपालिकाले आगामी आर्थिक वर्षमा खर्च गरिने बजेट र नीति तथा कार्यक्रम सार्वजनिक गरेको छ । शुक्रवार नगरपालिकामा आयोजित पत्रकार सम्मेलनमा नगरपालिकाका कार्यकारी अधिकृत युवराज दाहालले आगामी आर्थिक वर्षको बजेट ३५ करोड रुपैयाँ बराबरको हुने जानकारी दिए । वजेटमध्ये ९ करोड सामाजिक सुरक्षा, आन्तरीक श्रोत १० करोड तथा बाह्य श्रोत १६ करोड रुपैयाँ बराबरको रहेको छ । प्रस्तुत वजेटमा बताबरण मैत्री बिकासलाई उच्च प्राथमिकतमा राखिएको छ । दिगो बिकास तथा जनसहभागिता मुलक योजनालाई जोड दिएको अधिकृत दाहालले बताए । योजनामा वडा स्तरीय एक सय २३, लक्षित ९८, नगर स्तरीय ३५, प्रवद्र्धनात्मक ३१ ओटा योजना तथा कार्यक्रमहरु नगरपालिकाको श्रोतबाट सञ्चालन हुने जनाइएको छ । भने प्राप्त अन्य सबै योजना बैंकको रुपमा राखि क्रमश प्राथमिकता दिईने नगरपालिकाले जनाएको छ । आगामी आर्थिक वर्षको बजेटमा दमक अस्पतालको सेवा विस्तार, शहरी सौन्दर्यकरण, पार्क निर्माण, ईन्द्रेणी ताल र विज्ञान पार्कलाई उच्च प्राथमिकता दिइएको छ । यसरी नै वजेटमा दमक गौरवका योजनाको डिपीआर तयार भएसँगै योजना निर्माण अघि बढाइने जनाइएको छ । कार्यक्रममा तारावारी डिपो, क्याम्पसमोड आम्दाहुदै पाङमी चौक, सगरमाथा पेट्रोलपम्पबाट भृकुटी चौक जोड्ने सडकलाई नमुना सडकको रुपमा सञ्चालन गरिने भएको छ । यस सडक अन्र्तगत ढल, सौर्य वत्ती, फुटपाथ र बृक्षरोपण सहितको रहने जनाइएको छ । भाषा, साहित्य उत्थान र गतिविधीलाई समेत प्राथमिकता दिने जनाएको नगरपालिकाले दमक–४ मा खेलकुद प्रतिष्ठान बनाउने बताएको छ । दमक बसपार्क क्षेत्रको पूर्वीभागमा रवि चिसापानी सडकका लागि बस स्टेन निर्माण गरिने भएको छ भने आगामी स्थानीय तहको निर्वाचनलाई मध्यनजर गर्दै निर्वाचित जनप्रतिनिधीहरुका लागि अत्याधुनिक साजसज्जा भएको कार्यालयको कक्ष व्यवस्थापनमा समेत वजेट बिनियोजन गरिएको छ । यसरी नै दमकका विभिन्न चौकलाई पहिचान र शौदर्यता प्रदान गर्न राष्ट्रिय विभुति तथा बिशिष्ट व्यक्तीहरुको शालिक निर्माण गरिने समेत जनाइएको छ । दमक १६ मा एक नम्वर प्रदेशको आधुनिक नाट्याशाला निर्माणकालागि साढे तीन विगाहा जग्गा समेत उपलव्ध गराइएको जनाइएको छ । भने वाडन् ४ मा स्पोर्ट एकेडेमी निर्माण योजना अघि वढाइएको अधिकृत दाहालले जनाएका छन् ।