दमक, ५ माघ–दिवगत आफ्ना दुई आमाको स्मृतिमा झापाको धरमपुर–५ मंगलबारेमा रहेको प्रहरी चौकीलाई साढे तीन लाखको लागतमा प्रतिक्षालय भवन निर्माण गरिदिएका छन् । दिवगत आफ्ना दुई ममतामयी आमा कौशिला र तीरमाया राईको स्मृतिमा छोरा दीपेश राईको सक्रियतामा तीन छोराहरुले सो प्रतिक्षालय भवन निर्माण गरेका हुन् । तीन छोरा मध्ये माइलो दिपेश नेकपा एमाले धरमपुरको अध्यक्ष हुन् । उनी लामो समयदेखी धरमपरको विभिन्न सामाजिक संघ–संस्थाहरुमा क्रियाशिल छन् । बुधबार धरमपुर प्रहरी चौकीमा आयोजित कार्यक्रममा इलाका प्रहरी कार्यालय झिलझिलेका प्रहरी निरीक्षक कुन्दन देबले प्रतिक्षालय भवनको उद्घाटन गरेका छन् । उद्घाटन कार्यक्रममा प्रहरी निरीक्षक देबले नयाँ संस्कृतिको विकास गर्न हामी आफै जुट्नु पर्नेमा जोड दिए । कार्यक्रमको प्रमुख अतिथिसमेत रहेका प्रनि देबले संस्कार र सँस्कृतिको नाममा भोज–भत्तेर आयोजना गर्दा लाग्ने ठुलो खर्चलाई सकारात्मक क्षेत्रमा लगाउँन आग्रह गरे । उनले दिवगत आमाको स्मृतिमा प्रतिक्षालय निर्माण गर्ने छोरा दिपेश, रुपमान र पदमवहादुर राईलाई दोसल्ला ओढाएर सम्मान गरे । तीन लाख ४५ हजारमा निर्मित सो प्रतिक्षलयमा पचास जना भन्दा वढी वस्न सकिन्छ । कार्यक्रममा प्रतिक्षालय भवन निर्माणकर्ता दिपेश राईले प्रहरी कार्यालयमा आगान्तुकहरुलाई आराम गर्न प्रतिक्षालय निर्माण गरेको वताए । उनले प्रतिक्षालय भवनको उचित संरक्षण र संबद्र्धनमा प्रहरी चौकीले विशेष ध्यान दिनुपर्ने मागसमेत गरे । रुपमान राईको अध्यक्षतामा भएको कार्यक्रममा धरमपुर गाविस सचिव पुर्णशम्सेर कुवँर, धरमपुर गाविसका पुर्वअध्यक्ष बलजित राईले मन्तव्य राखेका थिए । कार्यक्रममा मंगलबारे बजार अध्यक्ष भीम नेम्बाङ, जेष्ठ नागरिक सम्मान प्रतिष्ठान धरमपुरक अध्यक्ष खडानन्द घिमिरे, साना किसान कृषि सहकारी धरमपुर अध्यक्ष यमनाथ चिमोरिया, प्रहरी चौकी धरमपुरका प्रहरी सहायक निरीक्षक गोविन्द सापकोटाको उपस्थिति रहेको थियो । कार्यक्रमको संचालन खेम दुलालले गरेका थिए ।