सबै बिद्यालयका बिद्यार्थी बालमहोत्सवमा सहभागि गराइने

दमक/नेपालमा नै पहिलो पटक उज्यालो बाल क्लवको आयोजनामा हुन लागेको राष्ट्रिय बालमहोत्सवलाई सफल बनाउनका लागि झापा र मोरङका जिल्ला शिक्षा कार्यालयहरुले जिल्लाका सबै बिद्यालयहरुलाई महोत्सवमा सहभागि गराउन आग्रह गरेकाछन् । प्याप्सन जिल्ला कार्यालय झापाले पनि जिल्लाका सबै नीजि बिद्यालयहरुलाई महोत्सव सफल बनाउन सहयोग गर्नका लागि आग्रह गरेको छ । माघ २५ गतेदेखि २९ गतेसम्म लखनपुरको आदिबासी रंगशालामा सञ्चालन हुने महोत्सवलाई सफल बनाउनका लागि जिल्ला शिक्षा कार्यालय झापाले सरोकारवालासबै संग छलफल गराएको र उल्लेख्य सहभागिता रहने झापाका जिल्ला शिक्षा अधिकारी योगेन्द्र बरालले बताए । उनले सबै सरकारी तथा नीजि बिद्यालयहरुलाई आफ्ना बिद्यार्थीहरु महोत्सवमा सहभागि गराउने ब्यवस्था मिलाउन आग्रह पनि गरे । उनले भने–‘नेपालमा नै पहिलो पटक हुन लागेको यो बालमहोत्सव प्रयोगात्मक सिकाइमा एउटा रामो कार्यक्रमको रुपमा हामीले लिएका छौ र सबैलाइ सहभागिताका लागि अनुरोध छ ।’ यसैगरि मोरङका जिल्ला शिक्षा अधिकारी देबेन्द्रराज खनालले बिद्यार्थीहरुलाई शैक्षिक भ्रमणको नाममा बिभिन्न ठाँउमा लगिने गरेको जनाउदै जिल्लाका सबै बिद्यालयहरुलाई एक पटक महोत्सवमा सहभागिता जनाउनका लागि अनुरोध गरिने बताए । उनले बालबालिकाको प्रतिभादेखि लिएर बिज्ञान प्रदर्शनी लगायत बालबालिकालागि उत्साह थप्नका लागि बिभिन्न बालमैत्री कार्यक्रमहरु आयोजना हुने यस महोत्सवलाई आफ्नै कार्यक्रमको रुपमा लिइने प्रतिबद्धता जनाए । प्याप्सन झापाका अध्यक्ष कोषराज प्याकुरेलले झापाका नीजि बिद्यालयहरुमा एकलाभन्दा बढि बिद्यार्थीहरु रहेको जनाउदै धेरैलाइ सहभागिताका लागि अनुरोध गरिसकिएको बताएकाछन् । उनले यस्तो कार्यक्रम बिरलैमात्र हुने भएकाले यो बिद्यार्थीहरुका लागि अवसर भएको जनाए । प्याप्सन झापाले यो कार्यक्रमलाई आफ्नो कार्यक्रमको रुपमा लिएकाले धेरैभन्दा धेरै बिद्यार्थी सहभागि गराउने लक्ष्य रहेको जानकारी दिए । उनले नीजि बिद्यालयहरुलाई बिद्यार्थीहरुलाई महोत्सवमा सहभागि गराउन पनि आग्रह गरे । महोत्सव मूल आयोजक समितिका सयोजक सन्तोष भण्डारीले महोत्सव बालबालिकाका लागि एउटा खुला बिश्व बिद्यालयको रुपमा बिद्यार्थीहरुले पाउने बताएकाछन् । बालबालिका तथा बिद्यार्थीहरुलाई लक्षित गरेर नेपालमा नै पहिलो पटक लगाउन लागिएको यो महोत्सवले बालप्रतिभाहरुको खोजि गर्नुको साथै बिज्ञानका चमत्कारिक अध्ययनको अवसर मिल्नेछ । महोत्सवको तयारी तिब्र रुपमा भइरहेको समेत भण्डारीले जानकारी दिए ।