सत्तारुढ राष्ट्रिय प्रजातन्त्र पार्टीका राष्ट्रिय अध्यक्ष डा. प्रकाशचन्द्र लोहनीले वर्तमान सरकारमा आफ्नो पार्टीको उपस्थितिको औचित्य सकिएकोले छिट्टै मन्त्रीहरुलाई फिर्ता बोलाउने बताएका छन् ।  सोमबार रिपोर्टर्स क्लब नेपालले आयोजना गरेको साक्षात्कारमा बोल्दै राष्ट्रिय अध्यक्ष लोहनीले सरकारमा राप्रपाको उपस्थिति भए पनि कुनै पनि कुरामा साझेदारी नभएको गुनासो पोखे । उनले भने, ‘सरकारको महत्वपूर्ण काम तथा निर्णयहरुमा राप्रपाको कुनै साझेदारी देखिएन्, त्यसैले सरकारमा रहीरहने कुरा अब स्वीकार गर्न सकिँदैन, यसबारेमा पार्टीभित्रपनि गम्भीर कुरा उठेको छ ।’

डा. लोहनीले आफ्नो पार्टी अब सरकारमा रहने कि नरहने भन्ने बारेमा पार्टीभित्रको कार्य सम्पादन समितिको बैठकले निर्णय गर्ने जनाए । उनले भने, ‘यो सरकारको तौर-तरिका हेर्दा अब हाम्रो पार्टी सरकारमा बस्ने औचित्य समाप्त भयो ।’ उनले प्रधानमन्त्री पुष्पकमल दाहाल नेतृत्वको वर्तमान सरकारको नियत नै चुनाव गर्ने नभएको आरोप लगाए । डा. लोहनीले भने, ‘संवैधानिक आयोगले अघि सारेको प्रतिवेदनको निहुँ निकालेर अहिले विभिन्न बखेडा झिक्ने काम भैरहेको छ, यो चुनाव पन्छाउने काम हो ।’

उनले संसदमा टेबुल भएको संविधान संशोधन विधेयकको कुनै औचित्य नरहेको दाबी गरे । लोहनीले भने, ‘अहिले अघि सारिएको संशोधनले मुलुकको हित गर्दैन, संशोधनमा उल्लेख गरिएका कतिपय विषयहरुले देशको राष्ट्रिय हित गर्दैन् ।’ उनले ५ नम्बर प्रदेशको सिमांकन हेरफेरको विषय र नागरिकताको प्रावधान गलत भएको टिप्पणी गरे ।  उनले आफ्नो पार्टी संविधान संशोधनको विपक्षमा नरहेको वताउँदै तर, अहिलेको संशोधन प्रस्ताव थाती राखेर चुनावमा जानु पर्ने वताए । ‘हामी पनि संविधान संशोधन गर्नुहुँदैन भन्ने पक्षमा छैनौं’ उनले भने, ‘तर अहिले संशोधन प्रस्तावलाई एक ठाउँमा थाती राखेर निर्वाचनमा जानुपर्छ, अहिले जनताको माग भनेको नै चुनाव हो ।’ उनले मधेश र पहाडलाई अलग पार्ने कुरा कुनै हालतमा स्वीकार्य नहुने वताए ।

उनले प्रचण्ड नेतृत्वको वर्तमान सरकारलाई चुनाव गराउँदा आफूले छोड्नुपर्ने हो कि भन्ने पीर देखिएको आशंका व्यक्त गर्दै भने, ‘सरकारको यो प्रवृत्ति दुर्भाग्यपूर्ण छ ।’ डा. लोहनीले पछिल्लो समय सरकारी अक्षमता बढिरहेको समेत गुनासो पोखे । उनले भने, ‘जनताले कर तिरेको पैसाबाट दुई खर्ब पैसा ढुकुटीमा बसिरहेको छ, खर्च गर्न नसक्दा बैंकमा व्याज बढिरहेको छ ।’ उनले सरकारसँग विकासका योजना नहुँदा सुशासनको ठाउँमा कुशासन र ईमानको सट्टा बेईमान बढेको बताए ।

उनले भूकम्प पीडितहरुले राहत नपाएको समेत गुनासो पोखे । लोहनीले भने, ‘भूकम्पपीडितले राहत नपाउनु भनेको सरकारको लाचारीपन हो, यो सरकारको नालायकीपन हो ।’ उनले सरकारले जनताको नाममा खेलाची गरिरहेको आरोप लगाए । लोहनीले थपे,‘भूकम्पपीडितलाई राहत दिनु भन्दा पनि हाकिम फेर्नतिर लागे, यसरी कसरी हुन्छ ?’ फरक प्रसँगमा डा. लोहनीले पार्टीको महाधिवेशनमा आफूले अध्यक्षको उम्मेद्धवारी दिने समेत बताए । उनले भने, ‘यो पार्टीलाई राष्ट्रवादी शक्तिको रुपमा स्थापित गर्न र खासगरी राष्ट्रिय संबद्र्धनवादी दल बनाउनका लागि नेतृत्व गरौं भन्ने मेरो चाहना छ, तर म यसबारेमा दुई÷तीन दिनभित्रै निर्णय गर्छु ।’