गाभी खोप साझेदारी नामक संस्थाका प्रमुखले कोरोनाभाइरसविरुद्धको सम्भावित खोप बन्ने संकेत पाइएको बताएका छन् । खोप व्यापक रूपमा उपलब्ध गराउन निकै लामो यात्रा गर्नुपर्ने उनको भनाइ छ ।

‘दुर्भाग्यवश हामीलाई कुन खोपले काम गर्छ भन्ने थाहा भइसकेको छैन । सबै कुरा सही भयो भने आउँदो जाडो महिनासम्ममा सम्भावित खोपको प्रभावकारिताको जानकारी हामी पाउँछौं,’ गाभीका प्रमुख सेथ बर्कलीले स्विस पत्रिका एनजेडजेड आम सोन्ताखलाई बताए ।

‘तर त्यस स्थितिबाट विश्वभरिका मानिसलाई व्यापक मात्रामा खोप उपलब्ध गराउने बाटो निकै लामो छ ।’

खोप तयार भएछ भने त्यसलाई उत्पादन गर्न र बाँड्नका लागि वैश्विक प्रयास आवश्यक हुने बर्कलीको भनाइ छ । खोप आएपछि उत्पादन क्षमता विस्तार गर्न अन्तर्राष्ट्रिय सहमति बन्नुपर्ने उनले बताए ।

उनले खोपको उपयोगका विषयमा स्पष्ट निर्देशिका जारी गर्न विश्व स्वास्थ्य संगठनलाई आग्रह गरे । आवश्यक परेका मानिसलाई भन्दा पनि धनीहरूलाई खोप उपलब्ध गराउने स्थितिबाट जोगिन विश्व स्वास्थ्य संगठन सतर्क हुनुपर्ने उनको कथन छ ।