काठमाडौँ । नेपाली उत्पादनलाई विश्वबजारमा पहुँच अभिवृद्धि गर्ने र युवालाई रोजगारी सिर्जना गर्ने उद्देश्यले अन्तर्राष्ट्रिय नेपाली युवा उद्यमी महासङ्घ स्थापना गरिएको छ ।
विश्वका विभिन्न मुलुकमा छरिएर रहेका युवा उद्यमीलाई समेटेर स्थापना गरिएको महासङ्घले नेपाली उत्पादनको विदेशमा प्रदर्शनी, बजारीकरणलगायत विषयमा सहजिकरण गर्ने र बढी भन्दा बढी युवालाई स्वरोजगार बनाउने लक्ष्य लिएको छ ।
उक्त संस्थाको शनिबार राति पूर्व राष्ट्रपति डा रामबरण यादवले उद्घाटन गर्दै विदेशी ज्ञान, सीप र प्रविधि भित्र्याएर युवा उद्यमशीलता विकासमा संस्थाले सहयोगी भूमिका खेल्ने विश्वास व्यक्त गरे ।“जन्मभूमिलाई कसरी आर्थिक रुपमा समृद्धि बनाउने भन्ने तपाँई युवाहरुमा सपना र भिजन रहेको छ, त्यसलाई साकार बनाउन उचित वातावरण बनाउन सरोकारवालाले सहयोग गर्न जरुरी छ”, उनले भने ।
पूर्व राष्ट्रपति यादवले नेपाल अनुपम प्राकृतिक सुन्दरता र भौगोलिक विविधतायुक्त मुलुक विश्व पर्यटनका लागि आकर्षक गन्तव्य रहेको भन्दै देश घुम्ने र विश्वभरबाट पर्यटक नेपालमा भित्र्याउन पनि संस्थाले भूमिका खेल्नुपर्नेमा जोड दिए ।
तराईको जंगल र चुरे क्षेत्र विनास भईरहेको र विकासका नाममा डोजर लगाएर डाडाकााााडा भत्काइएकोप्रति चिन्ता व्यक्त गर्दै जलवायुपरिवर्तनको जोखिम नियन्त्रणका लागि पर्यावरण र चुरे क्षेत्रको संरक्षणमा विशेष ध्यान दिनुपर्ने खाँचो औंल्याए ।
पूर्वराष्ट्रपति यादवले मुलुकको राजनीति स्थिरताका लागि ७० वर्ष भन्दा बढी सङ्गर्ष गरेर अहिलेको अवस्थामा आइपुगेको भएपनि अझै पनि देशको राजनीतिक अवस्था नसुध्रिएको र सुशासन प्रवद्र्धन हुन नसक्नु चिन्ताको विषय भएको टिप्पणी गरे ।
नेपाल चलचित्र विकास बोर्डका अध्यक्ष दयाराम दाहालले कला र संस्कृति बनाउन संस्थागत लगानी आवश्यक रहेको भन्दै नेपाली चलचित्रमा आधुनिक प्रविधिको उच्चतम प्रयोगले विश्व बजारमा प्रतिस्पर्धी बनाउन चलचित्र क्षेत्र लागि परेको बताए ।
नेपाल चेम्बर अफ कमर्सका उपाध्यक्ष कमलेश अग्रवालले विदेशी युवा उद्यमीको माध्यमबाट लगानी र प्रविधि भित्र्याएर आर्थिक विकासमा सरिक गराइनुपर्नेमा जोड दिए ।
नेपाल उद्योग वाणिज्य महासङ्घका उपनिर्देशक गोकर्णराज अवस्थी, शिक्षा उद्यमी दिराज शर्मा, पर्यटन व्यवसायी सुमान पान्डे लगायतले नेपालमा विदेशी लगानी भित्र्याउन महासङ्घले समन्वयकारी भूमिका खेल्नुपर्ने धारणा राखे ।
कार्यक्रममा संघका महासचिब समिर अनबरले देश तथा बिदेशमा रहनु हुने उत्साही र जांगरिला सिप जानेका यूबाहरूलाई महासंघमा जोडिन आग्रह गरे । उनले सिप भएर पनि लगानी गर्न नसक्नु हुने यूबाहरूले अब आत्तिनु पर्ने अबस्था नगरेको तर्फ जोड दिए ।
महासङ्घका अध्यक्ष स्वतन्त्रप्रताप शाहले चीन, हङ्कङ, अमेरिका, बेलायत अष्ट्रेलियालगायत ११ मुलुकका युवा उद्यमीलाई समेटिएको र अन्य मुलुकका युवा उद्यमीलाई पनि संस्थामा आवद्धता गरिने जानकारी दिए । शाहले प्रबासको सिप र लगानी अनि नेपालको सिप र लगानीबीच महासंघले पुलको काम गरेर नेपाल र नेपालीहरूको उज्जल भबिष्यको लागि महासंघ लागि पर्ने कुरा तर्फ जोड दिए । उनले नेपालमा सिप भए पनि लगानीको अभाबमा त्यस्तो सिप नमर्ने दाबी गर्नु गरे।
