मेष (चु, चे, चो, ला, लि, लु, ले, लो, अ)
बुद्धिस्थानमा रहेको चन्द्रमाका साथमा यो साता प्रारम्भ हुँदैछ, त्यसैले जे गरे पनि आफ्नै विवेक, बुद्धि र श्रमको उपयोग गर्नु राम्रो हुन्छ । सामान्यतया घरपरिवारमा खुसीको वातावरण सिर्जना हुनेछ । आत्मविश्वास र शीघ्र निर्णय गर्ने क्षमता अभिवृद्धि हुनेछ । रोकिएका काम सम्पादन हुनेछन् । पढाइलेखाइमा प्रगति हुनेछ । कसैलाई ज्ञान र अर्ति दिनुभयो उसले लाभ पाउने छ । मायाप्रेम र भावनात्मक क्रियाकलापमा समय व्यतीत हुनेछ । विपरीतलिङ्गी सहयात्रीबाट प्राप्त सल्लाहबाट गरिएको कामबाट फाइदा हुनेछ । सन्तानपक्षको राम्रो माया मिल्नेछ । मङ्गलबार र बुधबार विवाद, झैझगडा र मुद्दामामिलामा संलग्न नहुनु बेस हुनेछ भने आगामी शनिवारका दिन गाडीहाँक्दा, बाटो काट्दा र हातहतियारको प्रयोग गर्दा होस राख्नुपर्छ । आर्थिक पक्ष राम्रो छ, तर साताको मध्यभागमा निरर्थक लगानी हुने संकेत छ । समग्रमा मध्यम फल भएको साता देखिन्छ ।
बृष (इ, उ, ए, ओ, बा, बि, बु, बे, बो)
सुरुमा घरभित्रका केही झिनामसिना काममा संलग्न हुने समय छ । कामधन्दा र पारिवारिक समस्यामा केन्द्रित हुनाले फुर्सद निकाल्न सकिंदैन । सामाजिक र परोपकारका मार्गमा अवरोध हुनेछ । मङ्गलबार र बुधवार कल्पना र भावुकतामा रमाउँदा रमाउँदै समय गएको पत्तो पाउनुहुन्न । छोराछोरीबाट सन्तोष प्राप्त हुनेछ । पढाइलेखाइ र ज्ञानगुनका क्षेत्रमा आकर्षण बढ्ने छ । साताको अन्त्यमा भोगविलासमा आकर्षण बढ्न सक्छ, विलासिता र मनोरञ्जनका लागि समय र धन खर्च हुनसक्छ । सोचेजस्तै सफलता प्राप्त हुनेछ । पराक्रम बढ्नुका साथै शरीर फुर्तिलो रहने छ । दाम्पत्य जीवन सुखमय रहनेछ । साझेदारी वा पार्टनरसीपमा कुनै काम गर्ने योजना बनाउनु भएको छ भने त्यसका लागि अनुकूल छ । तर बिहीवार र शुक्रबार जोसँग बोले पनि होस राखेर बोल्नुहोला, झैझगडा र किचलोको सामना गर्नु पर्नेछ ।
मिथुन (का, कि, कु, घ, ङ, छ, के, को, ह)
सुरुमा अघिल्लो साताका क्रियाकलापको लेखाजोखा गरी योजना निर्माण गरिने छ । यस सातामा बौद्धिकक्षेत्र र ज्ञानगुनका क्षेत्रमा रहनेहरूले राम्रो गर्नेछन् । मानसम्मान र प्रतिष्ठामा बढोत्तरी हुनेछ । दीर्घकालिक योजनालाई मूर्त बनाउन चिन्तन महत्त्वपूर्ण बन्न सक्छ । मङ्गलबार र बुधबारका दिन घरगृहस्थीमा धेरै समय खर्चनु पर्नेछ । वैदेशिक रोजगारी गर्नेेहरूले घरायसी कुरा सम्झेर समय बिताउने छन् । साताको अन्त्यमा व्यावहारिक र प्राविधिक काममा विशेष सफलता प्राप्त हुने छ । बौद्धिक क्रियाकलापप्रति झुकाव बढ्ने छ । भाइबहिनी र छोराछोरीले सहयोग गर्नेछन् । आगामी शनिवारका दिन काम गर्दा आर्थिक, सामाजिक, व्यावहारिक आदि विभिन्न समस्या आइलाग्न सक्छन् । झिनामसिना कामका लागि पनि निक्कै खट्नु पर्छ । भरिसक्य मुद्दामामिला र झैझगडाबाट टाढा रहनु होला, निर्णय क्षमताले काम नगर्न सक्छ । पतिपत्नीका कुरा बाझ्ने सम्भावना देखिन्छ ।
कर्कट (हि, हु, हे, हो, डा, डि, डु, डे, डो)
यो साता कुनै नयाँ ठाउँमा निवेश र लगानीको वातावरण बन्नेछ । नातेदार र कुटुम्बले काममा सहयोग गर्नेछन् । प्रतियोगितात्मक क्रियाकलापमा सफल हुनुहुने छ । मित्रशक्ति र कुटुम्बबाट साथसहयोग पाइने छ । श्रममूलक काम वा कृषिकार्यतिर मन जानेछ । आत्मविश्वासमा अभिबृद्धि हुनेछ । व्यापार गर्नेले पनि सोचेजस्तै लाभ लिन सक्नेछन् । बिहीबार र शुक्रवार घरायसी कामधन्दा र पारिवारिक आवश्यकता पूर्तिका लागि खट्नु पर्ने छ । छरछिमेकमा कसैसँग व्यर्थमा वादविवाद हुनसक्छ । प्रेमसम्बन्ध र रतिरागका कारण निराशा भोग्नु पर्ने छ । मातापिताको प्रतिकूल स्वास्थ्यका कारण चिन्तित बन्नु हुनेछ । आगामी शनिवार प्रेमिल वातावरण बन्नेछ, किशोर किशोरीहरू रामरमाइलोमा भुलिने छन् । त्यसबाहेक विद्यार्थीहरुले आफ्नो क्षमता प्रदर्शन गरी स्याबासी पाउने समय पनि हो । अन्य सबैका लागि भौतिक सुविधाको दीर्घकालिक जोहो गर्ने अवसर र मौका देखापर्ने छ । समग्रतामा यो साता चिन्तन र बौद्धिकताको क्षेत्रमा राम्रो छ ।
सिंह (मा, मि, मु, मे, मो, टा, टि, टु, टे)
काम गर्न जाँगर चल्ने समय आएको छ । प्रेमको बन्धनमा बाँधिन पनि सकिन्छ तर के गर्ने के नगर्ने भन्ने बेचैनी हुन सक्छ । आम्दानीमा कमी हुने छैन । समयलाई उपयोग गर्नसके राम्रो फाइदा लिन सकिने छ । कतै रमाइलो यात्रामा निस्कन सक्नुहुन्छ । आतिथ्यपूर्ण सम्मान र मिठो भोजनको प्राप्ति हुनेछ । व्यवसाय र पेसाबाट राम्रै प्रतिफल प्राप्त हुनेछ, चिताएभन्दा बढी कमाउने योग छ । बिहीवार र शुक्रवार सामाजिक काममा संलग्न हुनुपर्ला । आगामी शनिवारका दिन विदेश वा प्रवासमा बसेर कामधन्दा र व्यवसाय गर्नेहरूले राम्रो लाभ प्राप्त गर्नसक्छन् । तर घरमा बस्नेले अनावश्यक दौडधुप गर्नु पर्नेछ । त्यसदिन नयाँ काममा हात हाल्नु श्रेयस्कर हुँदैन । समग्रमा यो साता उत्साहवर्द्धक समय नै छ, साताको अन्त्यसम्ममा शुभ समाचार प्राप्त हुनाले मन फुरुङ्ग हुने देखिन्छ ।
कन्या (टो, प, पि, पु, ष, ण, ठ, पे, पो)
साताको प्रारम्भमा बन्दव्यापार र व्यवसायमा समय दिन सकिंदैन र सोचेबमोजिम काम नबन्न सक्छ । तर मङ्लवारपछि सबैपक्षमा शुभ हुनेछ, धैर्यले काम लिने समय छ । साताको उत्तरार्द्धमा नयाँ काम गर्ने सोच बनाउनु भएको छ भने त्यसका लागि अनुकूल समय आएको छ । कुनै नयाँ उद्योगधन्दा वा व्यवसायको थालनी गरेमा व्यवहारिक रूपमा फाइदा पुग्नेछ । उपलब्धीमूलक यात्रा हुने योग छ । आकस्मिक रूपमा सम्पति प्राप्त गर्ने सम्भावना छ । उपहार पुरस्कार आदि मिल्नेछ । पारिवारिक जीवन संतोषप्रद हुनेछ । साझेदार वा सहयोगीको सङ्गतले लाभ प्राप्त हुने सम्भावना छ । व्यस्त समयचर्या कायम हुनेछ । परदेश वा विदेशबाट राम्रो समाचार प्राप्त हुनेछ । साताको अन्त्यमा धार्मिक, सामाजिक काम वा परोपकारका क्षेत्रमा समय र धन खर्च गर्ने समय आएको छ । तीर्थाटन वा भ्रमण/पर्यटनको योग बनेको छ ।
तुला (र, रि, रु, रे, रो, ता, ति, तु, ते)
यो साताको प्रारम्भमा नै विगतमा भएका राम्रा क्रियाकलापको स्मरण हुनेछ । मेवा मिष्टान्न परिकार मिल्नेछ । राज्यपक्षबाट सम्मानित हुने अवसर पाइने छ । छोराछोरीले सन्तुष्ट तुल्याउने छन्, कुनै खुसीको खबर दिनसक्छन् । मङ्गलबार र बुधवार आर्थिक पक्ष कमजोर बन्नेछ । पारिवारिक आवश्यकता, भोगविलास र शृङ्गारिक सामाग्री खरिद गर्न धन खर्च हुनेछ । टाढाको यात्रा फलदायी हुँदैन, घुमघाम र मनोरञ्जनका क्रममा निराशा भोग्नु पर्छ । साताको अन्त्यमा नियमित तथा दैनिक कामधन्धा र व्यवसायबाट फाइदा हुनेछ । गुमेको वा सापटीमा गएको धन फिर्ता आउनेछ । व्यवसायिक क्षेत्रमा बोलीको कदर हुने समय छ । विपरीत लिङ्गीको आकर्षण बढ्नेछ । प्रेमिल वातावरण बन्नेछ, जोस र जाँगर बढ्नेछ । धातुको कारोवारबाट धेरथोर लाभ मिल्नेछ । भौतिक सम्पत्तिको जोहो हुनेछ । आर्थिक पक्षमा सन्तुलन राख्न सके समग्रमा यो साता राम्रो देखिन्छ ।
बृश्चिक (तो, ना, नि, नु, ने, नो, या, यि, यु)
अभिभावक र बृद्धबृद्धाको आशीर्वाद काम गर्ने समय चल्दैछ । यात्रामा निस्कने योजना बनाउनु भएको छ भने लामो दूरीको लाभदायक यात्रा सम्पन्न हुनेछ । सामाजिक र पारिवारिक सम्बन्ध सुदृढ हुनेछ । परीक्षा, प्रतियोगिता आदिमा सफलता मिल्नेछ, प्रतिस्पर्धी परास्त हुनेछन् । भेटघाट र मनोरञ्जनमा समय व्यतीत हुनेछ । छोराछोरी र भाइबहिनीले सन्तुष्ट तुल्याउने छन् । किशोरकिशोरीहरू लक्ष्यप्रति सजग रहने छन् । बृद्धबृद्धाको धार्मिक र सामाजिक काममा झुकाव बढ्ने छ । तर आगामी बिहीबार र शुक्रवार खर्चको मात्रा ह्वात्तै बढ्न सक्छ, रकमको कारोबारमा सतर्कता अपनाउनु पर्छ । साताको अन्त्यमा महत्वाकाङ्क्षा र इच्छाहरू पूर्ण हुनेछन् । लाभदायक वस्तुको किनमेल र कारोबार गरिने छ । घरायसी वातावरण आफ्नै पक्षमा रहनेछ । समग्रतामा राम्रो परिणाम प्राप्त हुनेछ । मन फुरुङ्ग हुनेछ, विपरीतलिङ्गीसँग सम्बन्ध आत्मीय बन्नसक्छ ।
धनु (ये, यो, भ, भि, भु, ध, फा, ढ, भे)
भाग्यको चन्द्रमाका साथमा साताको प्रारम्भ हुनेहुँदा राम्रो समय रहनेछ । इष्टमित्रले तपार्इंको प्रशंसा गर्नेछन् । परोपकारका क्षेत्रमा आकर्षण बढ्ने छ । अप्रत्याशित काम बन्ने योग छ । इच्छाएको जिम्मेबारी प्राप्त हुनसक्छ । मङ्गलबार र बुधवार कर्मप्रति लगनशील बन्ने समय छ । शारीरिक प्रतिस्पर्धाका कामतिर मन जानेछ । कृषिक्षेत्रका व्यक्तिहरू खासगरी पशुपालक र दुग्धव्यवसायमा संलग्नहरूले मनग्ये लाभ प्राप्त गर्नेछन् । कर्मचारीले हाकिम वा विशिष्ट व्यक्तिको सहयोग प्राप्त गर्नेछन् । बिहीबार र शुक्रवार साथीभाइ र नातेदारको सहयोग जुटाउन सकिन्छ । राज्यपक्षबाट लाभ प्राप्त हुनेछ । तर साताको अन्त्यमा शरीरमा आलस्य र थकानको अनुभव हुनेछ, मनमा अशान्ति र छटपटी व्याप्त हुनेछ, खर्चको मात्रा बढ्न सक्छ । तर समग्रमा यो साता विगतका कमीकमजोरी सम्झने समय होइन, कर्मप्रति चासो राखेमा भाग्य अभिबृद्धि हुने साता छ ।
मकर (भो, ज, जि, खि, खु, खे, खो, गा, गि)
साताको प्रारम्भ प्रतिकूल छ । बाटो काट्दा, यात्रा गर्दा वा हातहतियारको प्रयोग गर्दा सावधानी अपनाउनु पर्छ । आइतवार र सोमवार मनमा निराशा उत्पन्न हुनसक्छ, बौद्धिक र प्राज्ञिक क्षेत्रमा खिन्नता बढ्नेछ । स्वास्थ्यमा अचानक सानो समस्या देखिन सक्छ, तर डराइहाल्नु पर्दैन । तर मङ्गलबारपछिको समय राम्रो देखिन्छ । यो साता हातमा अचानक सोच्दै नसोचेको धन प्राप्त हुनसक्छ । कतिपय राम्रा अवसर प्राप्त गर्नुहुनेछ । नयाँ व्यवसाय वा नोकरीको प्रयास गर्न अनुकूल समय आएको छ । विभिन्न जिम्मेवारी निर्वाह गर्नुका साथै दौडधूप गर्नु पर्नेछ । यात्रा रमाइलो हुनेछ । साताको अन्त्यमा अपूरा कार्य पूर्ण हुनेछन् । धार्मिक तथा आध्यात्मिक क्षेत्रतर्फको काममा सहभागी बन्नु पर्नेछ र त्यस पाटोका काममा प्रशंसित हुने अवसरसमेत प्राप्त हुनेछ । समग्रतामा यो साता नराम्रो छैन, आफन्तहरूबाट भनेजस्तो सहयोग नपाइएला, तर काममा बाधा हुनेछैन ।
कुम्भ (गु, गे, गो, सा, सि, सु, से, सो, द)
प्रेमिल र शान्त वातावरणको उदय भएको छ । मन फुरुङ्ग हुनेछ । विपरीतलिङ्गी मित्रसँग मन फुकाएर आफ्ना कुरा राख्न सकिने छ । घुमघाम, भ्रमण र पर्यटनको अवसर आउने छ । प्रेमसम्बन्ध र दाम्पत्य जीवनका लागि समय निकाल्नु बुद्धिमानी देखिन्छ । तपाईं घरबाहिर हुनुहुन्छ भने यो साता जीवनसाथी वा बालबच्चासँग कुराकानी गरी व्यवहारिक जानकारी लिनु असल हुनेछ । साताको अन्त्यमा व्यवसायिक र सामाजिक सम्बन्ध सुदृढ हुनेछ, तर चिन्तनमूलक काम र अध्ययन, अध्यापन एवं लेखनका क्षेत्रमा बाधा छ । बन्दव्यापार र साझेदारीबाट राम्रो प्रतिफल प्राप्त हुनेछ । आफूमुनिका नातेदार वा बालबच्चासित राम्रो व्यवहार गर्नुहोला । तर मङ्गलवार र बुधवार अष्टम भावमा चन्द्रमाको बास हुने भएकाले हडबड र शीघ्रताले काम गर्ने प्रवृत्तिमा नियन्त्रण गर्नु राम्रो हुन्छ । स्वास्थ्यप्रति उदासीन नबन्नु होला, यस समयमा सुरु भएको सानो रोगले दीर्घकालसम्म सताउन सक्छ ।
मीन (दि, दु, थ, झ, ञ, दे, दो, च, चि)
त्यति अनुकूल समय देखिंदैन । कामको चाप र दायित्व बढ्नेछ । सुरुमा छैटौं भावमा र बिहीवारपछि अष्टम भावमा चन्द्रमा रहने भएकाले यो साता दृष्टिशक्तिमा कमी आउन सक्छ । व्यवहारिक समस्याले विभिन्न काममा अवरोध सिर्जना हुनेछ । खासगरी बिहीवार र शुक्रवार दुर्घटनाको जोखिम पनि देखिन्छ, सानोतिनो चोटपटक नै पनि लाग्न सक्छ, सचेत एवं सावधान रहनु होला । यद्यपि यो साता मन आनन्दका लागि आकर्षित बन्नेछ र विलासिताका भावनाहरू जागृत हुनेछन् । प्रेमसम्बन्धमा सुधार आउने छ । शरीर फुर्तिलो हुनेछ, जोस र जाँगर बढ्नाले आम्दानीमा समेत बढोत्तरी हुनेछ । अभिभावकवर्गको आशीर्वाद प्राप्त हुनेछ । तर आगामी शनिवार भाग्यमा चन्द्रमा पुग्ने भएकाले सप्ताहान्तमा राम्रो समाचार सुन्न पाउनु हुनेछ । मिश्रित फल पाइने साता भए पनि यो साता लामो दूरीको यात्रामा निस्कन वा यातायातको साधन किन्न अनुकूल समय नै देखिन्छ ।
(सहप्राध्यापक कृष्णप्रसाद कोइरालाले लेख्नुभएको राशिफल ज्योतिष साथीबाट लिएका हौं ।)
