भदौ १५, २०७५
काठमाडौं — संसारभरिका प्रश्नको उत्तर गूगलमा पाइन्छ । अचम्मको कुरा त, अमेरिकी कंग्रेसले सोध्ने प्रश्नको उत्तर दिने मानिसको विषयमा विवाद आएको छ ।

अमेरिकी चुनावमा हस्तक्षेप र सामाजिक सञ्जाल प्लेटफर्मलाई प्रभावित पारेको आरोपमा ट्विटरका सीईओ, फेसबूकका सीओओ समेत गूगलका शीर्ष अधिकारीलाई अर्को साता सांसदहरूलाई जवाफ दिन संसदमा उपस्थित गराइने भएको छ ।

अमेरिकाका राष्ट्रपति डोनल्ड ट्रम्पले गूगलको कडा आलोचना गरेपछि रिसाएको गूगलले आफ्ना कनिष्ठ अधिकारीलाई जवाफ दिन पठाउने भएको छ । यसले सांसदहरूलाई रुष्ट बनाएको छ ।

हालै ट्रम्पले गूगलमाथि आफ्नो छवि बिगारेको आरोप लगाएका थिए । आफ्नो बारेमा लेखिएका नकारात्मक समाचारलाई सजिलै भेटाउन गूगलले भूमिका खेलेको उनको भनाइ छ ।

ट्रम्पसँगको रिसमा अमेरिकी संसदमा गूगलले सीईओ सुन्दर पिचाईलाई नपठाएर कनिष्ठ अधिकारीलाई पठाउन लागेको हो । त्यसले सांसदहरूलाई क्रोधी बनाएको छ र एक सांसदले गूगलको नेमप्लेटअघि खाली कुर्सी राख्न भनेको
बताए । यसबाट सुन्दर संसदीय सुनुवाइबाट टाढा रहेको देखाउने प्रस्ट हुने उनले बताए ।

ट्विटरका सीईओ ज्याक डोर्सी र फेसबूकका मुख्य सञ्चालन अधिकारी शेरिल स्यान्डबर्ग बुधवार सिनेटको इन्टेलिजेन्स कमिटीसमक्ष पेश हुनेछन् । गूगलको मूल कम्पनी अल्फाबेटका सीईओ ल्यारी पेजलाई पनि सुनुवाइमा बोलाइएको छ ।

सुनुवाइमा नोभेम्बर हुने मध्यावधि चुनावमा सम्भावित धाँधली रोक्ने विषयमा चर्चा हुनेछ । गूगलले वरिष्ठ उपाध्यक्ष (विश्वव्यापी मामिला) केन्ट वाकरलाई सुनुवाइमा पठाउने भएको छ ।

सिनेट कमिटीका सदस्य गूगलको यो निर्णयबाट रुष्ट छन् । कमिटीका एक प्रवक्ताले भने, ‘यो सुनुवाइको उद्देश्य वरिष्ठ नेतृत्वबाट निर्णयका बारेमा जानकारी हासिल गर्नु हो, निर्णय लागू गराउने मानिसको कुरा सुन्नु हैन ।’

एजेन्सी