स्थानीय निर्वाचन बिर्सिसकेका मतदाता २० वर्षपछि हुन लागेको स्थानीय चुनावमा भाग लिन पाउने भएपछि दंग छन् । वैशाख ३१ मा २० वर्षपछि आफ्ना प्रतिनिधि आफैंले छान्ने अवसर जुर्दैछ । राजनीतिक दलहरूले पनि यही मौकामा आफ्नो स्थानीय तहमा आफ्नो पकडलाई सकेसम्म राम्रो बनाउन खोजिरहेका छन् । नेपाली राजनीतिका ‘हाइ प्रोफाइल’ नेताहरू केपी शर्मा ओली र कृष्णप्रसाद सिटौलाको जिल्ला झापामा स्थानीय निर्वाचनको चहलपहल शुरु भएको छ । झापाका प्रमुख जिल्ला अधिकारी उत्तरकुमार खत्रीका अनुसार झापामा स्थानीय निर्वाचनको माहौल सिर्जना भइरहेको छ ।
शान्तिपूर्ण तरिकाले स्थानीय निर्वाचन गराउनका लागि जिल्लाको सुरक्षा संयन्त्र अत्यन्तै चनाखो भएर बसेको उनले बताए । प्रजिअ खत्रीका अनुसार झापाका सबै राजनीतिक दलले स्थानीय चुनावलाई सहयोग गरिरहेका छन् । ‘जिल्लामा निर्वाचन भाँड्न खोज्ने कोही पनि छैनन्,’ उनले भने, ‘हामी शान्तिपूर्ण तरिकाले स्थानीय चुनाव हुन्छ भन्ने कुरामा ढुक्क छौं ।’
जिल्ला निर्वाचन कार्यालय झापाका अनुसार झापामा पाँच लाख २१ हजार मतदाता छन् । तर यो संख्या चाहिँ केही घट्नेछ । १६ वर्षकै उमेरमा मतदाता नामावली रजिस्ट्रेसन हुने भएकाले १६ देखि १८ वर्ष उमेर समूहका केही घट्ने जिल्ला निर्वाचन अधिकृत गोपाल आचार्यले बताए ।
केन्द्रबाट मतदाताको अन्तिम नामावली अझै गइसकेको छैन । निर्वाचन केन्द्रको छिनोफानो भइसकेपछि मतदाताको संख्या, नामावली र केन्द्रको जानकारी जिल्लामा जानेछ । जिल्लामा दुई सय ८६ वटा मतदान केन्द्रहरू निमार्ण गर्नेगरी केन्द्रमा सिफारिश गरिएको छ । यसमा पनि केही संख्या थपघट हुन सक्छ । तर अधिकांश मतदाताले पहिलेकै केन्द्रबाट मतदान गर्न पाउनेछन् ।
जिल्ला निर्वाचन कार्यालयका अनुसार वैशाख लागेसँगै मतदाता शिक्षालाई पनि अघि बढाउने तयारी भइरहेको छ । मान्छेले स्थानीय चुनाव के हो भन्ने बिर्सिसकेकाले व्यापक रूपमा मतदाता शिक्षालाई अघि बढाउने तयारी भएको आचार्यले बताए ।
जिल्लामा राजनीतिक दलहरूलाई निर्वाचन आचारसंहिता लगायतका विषयमा जानकारी गराइसकिएको छ । दलहरू पनि आन्तरिक तयारमिा जुटिरहेका छन् । गाउँमा रहेका नेताहरूले टिकटका लागि लबिङ गरिरहेका छन् ।
तर उम्मेदवारहरूको छिनोफानो हुन बाँकी रहेकोले पार्टीहरूले आमसभाका कार्यक्रमहरू चाहिँ शुरु गरेका छैनन् । झापाका ७ निर्वाचन क्षेत्रमा १५ स्थानीय तह कायम भएका छन् । आठ नगरपालिका र ७ गाउँपालिका कायम भएका छन् ।
संबिधानसभाको निर्वाचनलाई हेर्दा झापा कुनै पनि दलको एकलौटी पकड रहेको जिल्ला होइन । झापामा माओवादीको तुलनामा कांग्रेस एमालेको अवस्था राम्रो भएको विश्लेषण गरिएको छ । संविधानसभाको निर्वाचनमा झापामा एमालेले चार सिट जितेको थियो भने कांग्रेसले तीन सिट जितेको थियो ।
संबिधानसभाको निर्वाचनमा झापा क्षेत्र नम्बर एकबाट एमालेका रबिन कोइराला, दुईमा कांग्रेसका सुधीर कुमार सिवाकोटी, तीनमा कांग्रेसका कृष्णप्रसाद सिटौला, चारमा एमालेका प्रेमबहादुर गिरी, पाँचमा कांग्रेसका केशव बुढाथोकी, ६ मा एमालेका दीपक कार्की र सातमा एमालेकै केपी ओली विजयी भएका थिए । निर्वाचनको तयारीलाई लिएर जिल्लामा राजनीतिक दलको सक्रियता पनि बढ्दै गएको छ ।
