भारतको दिल्लीमा एक दुब्ला युवकले युवतीहरूलाई फकाउनका लागि चारपाँचवटा शर्ट लगाउने अनि उनीहरूबाट पैसा ठग्ने गरेको घटना सार्वजनिक भएको छ ।
बलिष्ठ ज्यान देखिएमा युवतीलाई फसाउन सजिलो हुने विश्वास गर्दै लुगा कोचेर ती युवकले तीन युवतीसँग मित्रता गाँसेका थिए ।
एक धनी युवतीसँग झुटो बोलेर उनले टीकाटालो समेत गरे । तर एक ठूलो सार्वजनिक विद्यालयमा भर्ना गराउने नाममा ठगेको मुद्दामा उनी प्रहरीको कब्जामा परे । त्यसपछि उनका सबै क्रियाकलापको पोल खुल्यो ।
पश्चिम दिल्लीका यी युवकको नाम तरुण पोद्दार हो । बिहारी पोद्दारबाट दुई ल्यापटप, एक मोबाइल फोन, एक ठूलो उडान कम्पनीको झुटो परिचयपत्र, आठ डेबिट र क्रेडिट कार्ड, आठ सिम कार्ड र एक किताब बरामद भएको छ । किताबमा उसले लेखकको नाम मेटेर आफ्नो नाम राखेको पाइयो ।
प्रहरीले बताएअनुसार, जनकपुरीमा बस्ने एक महिलाले उनको छोरालाई आरकेपुरमको एक ठूलो सार्वजनिक विद्यालयमा भर्ना गराउने नाममा पोद्दारले साढे आठ लाख भारु लिएको बताइन् । महिलालाई उसले भर्ना भएको कीर्ते इमेल पठाएको थियो ।
महिला विद्यालय पुग्दा उनको छोरो भर्ना नै नभएको र पूरै ठगिएको थाहा पाइन् । अनि उनले २९ मेमा प्रहरीलाई उजुरी गरिन् ।
अनुसन्धानका क्रममा आरोपितले अनेकचोटि ठेगाना परिवर्तन गरे । पछि उनलाई साइबर सेलको टोलीले पक्रियो । प्रहरीले गरेको सोधपुछमा आरोपितले बताएअनुसार, उनी पातला भएकाले कोटमुनि चारपाँच शर्ट लगाउँथे । युवतीहरूलाई प्रभावित पार्नका लागि उनी विलासी गाडी र दुई अंगरक्षक समेत राख्थे ।
आरोपितले एक धनी युवतीलाई प्रेमजालमा फसाएका थिए । उससँग विवाह हुनुअघि नै पोल खुल्यो ।
अनुसन्धानका क्रममा के पनि पत्ता लाग्यो भने एक ठूला अंग्रेजी लेखकको पुस्तकमा उनले आफ्नो नाम राखिदिएका थिए । त्यो किताब उनले एक अन्लाइन शपिङ साइटमा पनि अप्लोड गरेका थिए ।
उनले फेसबूक अकाउन्टमा पनि अनेकौं झुटा कुरा लेखेका थिए र युट्युबमा पनि झुटा कुरा राखेर युवतीहरूलाई आकर्षित गर्ने गरेका थिए ।
पोद्दारले कम्प्युटर साइन्समा बीएससी गरेका छन् । उनी अंग्रेजी बोलेर युवतीलाई फसाउने गर्थे ।लोकान्तर
