एजेन्सी– कोही मानिस सय बर्ष बाँचेको छ भने हामी तिनलाई ज्यूँदो इतिहास मान्दछौ । किनकी यतिको लामो उमेरसम्म कमै मानिसहरु जीवित रहने गर्दछन् ।
सय बर्ष उमेर कटेका मानिस सकेसम्म कुनै काम गर्न सक्दैनन् । अझ सय कटेका मानिस अध्ययन गर्दैछन् भन्दा पत्याउन ग्राहो हुन्छ । तर भारतमा १०५ वर्षीया वृद्धाले यस कुरालाई झुटो साबित गरेकी छन् ।
भारत केरलाकी भागिरथी अम्मा (आमा) नामले परीचित १०५ वर्षीया वृद्धाले कक्षा ४ को परीक्षा दिएकी छन् । उनी अध्ययनमा मन नगर्ने र पढ्नलाई विभिन्न बहाना बनाउनेहरुका बिचमा उदाहरण बनेकी छन् । भागीरथी अम्मा केरलाको राज्य साक्षरता मिशन अन्र्तगतको ४ कक्षा बराबरको (चौथो वर्ग) परीक्षामा भाग लिदैं पढाईका लागी उमेर बाधक नहुने साबित गरेकी छन् ।
पढ्नलाई उनले बल्ल समय पाएकी हुन् । पढ्न मन लागेमा तथा ढृढ इच्छा शक्ति भएमा उमेरले नछेक्ने उनी बताउँछिन् । ५ बर्षको उमेरमा नै पढ्न मन लागेपछि स्कूल भर्ना भएकी भागिरथिले आफ्नी आमाको मृत्युपछि कक्षा ३ को पढाई छाडेर भाई बहनीको रेखदेख गर्नु परेको थियो ।
जसका कारण अध्ययन गर्ने उनको सपना बाल्यकालमै रोकिएको थियो । वयस्कमा घर परीवारको कारण पढ्न नपाएकी उनले ३० बर्षको उमेरमा श्रीमानको मृत्युपछि ६ सन्तानको जिम्मेवारी लिनु परेको थियो ।
तर झण्डै १ सय बर्षपछि उनले केरलाको कोल्लमस्थित साक्षरता मिशन अन्र्तगतको समकक्षा शिक्षा अन्र्तगत पढाई शुरु गरेकी हुन् । भागीरथी अम्माको पढाईमा उनकी कान्छी छोरीले मद्दत गर्दै आएकी छन् । उनले पुरानो शैक्षिक योग्यतालाई थप गर्ने मनसायले कक्षा ४ बराबरको समकक्षामा उनलाई भर्ना गरिएको हो ।
भागिरथि अम्मासँग आधार कार्ड नभएकाले सरकारबाट पाउने विधवा र वृद्ध पेन्सन पाउनबाट समेत उनी बञ्चित रहेको भारतीय सञ्चार माध्यमले जनााएका छन् ।
