एजेन्सी/ युगान्डामा एक इमामलाई आफ्नी पत्नी वास्तवमा एक पुरुष भएको थाहा पाएपछि बर्खास्त गरिएको छ ।
शेख मोहम्मद मुटुम्बाकी बेहुलीले छिमेकीको टीभी चोर्दै गरेको बेलामा प्रहरीले पक्राउ गरेपछि उनी पुरुष भएको थाहा भयो ।
चोरले पछि इमामको पैसा चोर्नका लागि आफू महिला भएको नाटक गरेको स्वीकार गरेको कायुंगाको स्थानीय सञ्चारमाध्यमले लेखे ।
यो सुनेर स्तब्ध भएका मुटुम्बालाई अनुसन्धान चलुन्जेल धर्मगुरु इमाम पदबाट निलम्बन गरिएको छ । उनी क्याम्पिसी मस्जिद नूर मस्जिदमा इमाम हुन् ।
दुई हप्ताअघि भएको बिहेपछि आफू पत्नीसँग ननजिकिएको किनकि उनले आफू रजस्वला रहेको बताएको उनले दाबी गरे ।
मुटुम्बाले स्वाबुल्लाह नाबुकीरा नाम गरेकी महिलालाई बिहे गरेको ठानेको बताए । बिहा गत डिसेम्बर महिनामा परम्परागत इस्लामी समारोहबीच सम्पन्न गरिएको थियो ।
बेहुलीले छिमेकीको टीभी चोर्दै गर्दा प्रहरी त्यहाँ पुगेको थियो । उनी महिला हुन् भन्ठानेर एक महिला अधिकारीले शरीर खानतलाश गरेकी थिइन् तर ऊ त पुरुष पो रहेछ ।
मुटुम्बा यो घटनाको बारेमा केही पनि बोल्न चाहँदैनन् र उनलाई मनोपरामर्शको आवश्यकता छ ।
साथी र सहकर्मीहरूले पनि उक्त व्यक्तिसँग आफूहरू झुक्किएको बताए । उसले प्रायः हिजाब लगाउने गरेको थियो ।
मस्जिदमै काम गर्ने अमिसी किबुंगाले भने, ‘उसको स्वर मीठो थियो र ऊ महिलाले जस्तै गरी हिँड्थ्यो ।’
बिहेको चार दिनपछि मुटुम्बाले बेहुलीले सुत्दा लुगा खोल्न नमानेको भनी गुनासो गरेको किबुंगाले खुलासा गरे ।
आरोपित व्यक्तिले पछि प्रहरीलाई आफ्नो नाम रिचर्ड तुमुशाबे भएको बताए अनि मुटुम्बाको पैसा चोर्न उससँग बिहे गरेको स्वीकार गरे ।
