रुसको स्वेर्दलोभ्स्क क्षेत्रमा एक महिलाले आफ्नो नवजात शिशुलाई वाशिङ मशिनमा राखेपछि शिशुको मृत्यु भएको छ । महिलामाथि हत्याको मामिलामा अनुसन्धान चलिरहेको छ ।
कपाल काट्ने व्यवसायमा रहेकी नादेझ्दा जाभियालोभाले समयअगावै (प्रिमच्योर) चौथो शिशु जन्माएको रुसी अधिकारीहरूले बताए ।
पत्नीलाई रगतपच्छे देखेपछि पति डेनिसले एम्बुलेन्स बोलाएका थिए । प्रहरीको स्रोतले शिशुलाई वाशिङ मशिनमा राखिएको कुरा पुष्टि गरे ।
आमा अहिले अस्पतालमा छिन् र बच्चा पूर्ण विकसित नभइकन जन्मेको बताइन् । उनका विरुद्ध नवजात शिशुको हत्याको मुद्दा लगाइएको छ । रुसको अपराध संहिताको धारा १०६ अनुसार हत्या साबित भएमा पाँच वर्षसम्मको कारावास सजाय हुन सक्छ ।
नादेझ्दा आफ्नो शहरमा लोकप्रिय हेयरड्रेसर थिइन् र साथीहरूले उनलाई असल आमा भनी वर्णन गरेका थिए । पहिलेको विवाहबाट उनको एक छोरो छ भने अहिलेका पतिबाट दुई छोरी छन् ।
नादेझ्दाकी साथी एलेना फिर्तसेभाले भनिन्, ‘नादेझ्दा मेहनती र स्याहारसुसार गर्ने आमा हुन् । बच्चालाई मार्नुपर्ने त्यो पनि यति क्रूर तरिकाले मार्नुपर्ने कुनै कारण थिएन ।’
