भरतपुरको ताजा मत परिणाम एमाले फेरी दगुर्न शुरु, रेणु पछारिन थालिन

भरतपुर महानगरपालिकामा एमालेका देवी ज्ञवालीले माओवादी केन्द्रकी रेणु दाहाल सँगको मत अन्तर फेरि बढाएका छन्। अहिले माओवादी केन्द्रकी मेयर पदकी उम्मेद्वार रेणु दाहालको भन्दा एमालेका मेयर पदका उम्मेद्वार देवी ज्ञवालीको १४ सय ५९ मत बढी छ। भरतपुर महानगरपालिका वडा नम्बर १६ को प्रारम्भीक मत गणनापछि एमालेले फेरि अग्रता बढाएको हो। यसअघि २४ वडामा आफ्नो अग्रता बढाएको एमालेले १६ मा खसेको ५७२३ मत मध्ये १३६१ को गणनामा १४५९ मतको अग्रता बनाएको हो। यो वडाको प्रारम्भीक मतसहित अहिलेसम्म एमालेका देवी ज्ञवालीले ३३७३८ मत पाएका छन् भने रेणु दाहालले ३२२७३ मत पाएकी छन्। यस्तै उप प्रमुखमा कांग्रेसले ३५८५० र एमालेले ३०५०० मत पाएका छन्। वडाध्यक्षमा भने कांग्रेसका उम्मेद्वारले अग्रता लिइरहेका छन्। भरतपुर महानगरपालिकामा २९ वटा वडा छन् । यहाँ कुल मतदाता एक लाख ५२ हजार रहे पनि एक लाख १२ हजारले मतदान गरेका छन् ।