उर्लाबारी/नेपाली कांग्रेस उर्लाबारीका मेयर पदका उम्मेद्वार खड्ग फागोको घर अगाडि बम विष्फोट भएको छ । आइतबार विहान करिब २ बजेको समयमा फागोको घरको पर्खालमा बम विष्फोट भएको हो ।
सो विष्फोट कस्ले गराएको हो भन्ने पत्ता लाग्न सकेको छैन । इलाका प्रहरी कार्यालय उर्लाबारीका प्रहरी निरीक्षक चन्द्रबहादुर थापाले विष्फोटका विषयमा अनुसन्धान भइरहेको बताउनुभयो । आतंक सिर्जना गर्नका लागि प्लाष्टिक जारमा विष्फोटक पदार्थ राखी विष्फोट गराएको हुन सक्ने उहाँले जानकारी दिनुभयो ।
मेयर पदका उम्मेद्वार खड्ग फागोले आफू घरमै सुतिरहेको बेला विष्फोट भएको बताउनुभयो । नेपाली कांग्रेसले आज उर्लाबारीमा चुनावी सभा आयोजना गरेको छ । सो सभालाई प्रभावित पार्ने उद्देश्यले मेयरका उम्मेद्वारका घरमा विष्फोट गराएको कांग्रेस उर्लाबारीका निर्वाचन परिचालन समिति संयोजक केशव कार्कीले दावी गर्नुभयो । उहाँले कांग्रेसको पक्षमा आएको जनलहर देखेरपनि यस प्रकारको हर्कत गरिएको उहाँको भनाई छ ।