काठमाडौ, २ कात्तिक । सत्तारुढ दल नेपाली कांग्रेसका केन्द्रीय नेताले नै देश टुक्रिने चेतावनी दिएका छन् । कांग्रेस केन्द्रीय सदस्य तथा सांसद फरमुल्लाह मन्सुरले ब्यवस्थापिका संसदको मंगलबारको बैठकमा बोल्दै देश टुक्रिने चेतावनी दिएका हुन् । ब्यवस्थापिका संसदको बैठकमा विशेष समय लिएर बोल्दै मन्दसुरले संविधान संशोधन गरेर मधेसी, मुस्लिम र थारुका माग सम्बोधन नभए नेपालको हालत पाकिस्तानबाट बंगलादेश टुक्रिएजस्तै हुने चेतावनी दिए । पाकिस्तानमा मुस्लिम समुदायले अधिकार माग्दा नपाएकै कारण देश टुक्राउएको स्मरण गराउँदै कांग्रेस नेता मन्सुरले नेपालमा पनि मधेसी, मुस्लिम र थारु समुदायका माग सम्बोधन नभए देश टुक्रिने दाबी गरे । असन्तुष्ट पक्षको माग सम्बोधन गर्न तत्काल संविधान संशोधन गर्नुपर्नेमा जोड दिँदै उनले संविधान संशोधन नभई कुनै पनि तहको निर्वाचन हुनै नसक्ने बताए । आफूहरुले रिजर्भेसन राखेर संविधानमा सहि गरेको स्मरण गराउँदै मन्सुरले संविधान ९० प्रतिशतले जारी गरेको भन्ने तर्क पनि गलत भएको दाबी गरे । मन्सुर नेपाली कांग्रेसको १३औं महाधिवेशनबाट केन्द्रीय सदस्यमा विजयी भएका हुन् । उनी मुस्लिम कोटाबाट केन्द्रीय सदस्य निर्वाचित भएका थिए ।