इस्लामावादः पाकिस्तानमा पब्जी खेलले नकरात्मक रुपमा मनोवैज्ञानिक असर गरेपछि एक किशोरले आफ्नै परिवारका विभिन्न सदस्यको हत्या गरेका छन्।

पाकिस्तानी प्रहरीका अनुसार पञ्जाब प्रान्तको लाहोर जिल्लामा एक युवाले आफ्नी आमा र तीन भाइबहिनीको गोली हानी हत्या गरेपछि पब्जीलगायत खतरनाक भिडियो गेममा प्रतिबन्ध लगाउन प्रान्तीय र संघीय सरकारलाई सिफारिस पठाउने कार्य अगाडि बढाइएको छ।

पञ्जाब प्रहरीका प्रवक्ताका अनुसार युवा पुस्तालाई उनीहरूको हानिकारक प्रभावबाट जोगाउन गोली हानाहान र हिंसाको बढ्दो प्रवृत्ति सिकाउने खेलहरूमाथि प्रतिबन्ध लगाउन सिफारिस गरिने भएको हो।

हालै भएको घटनामा १४ वर्षका किशोरले पब्जीकै प्रभावका कारण आफ्नी आमा र तीन भाइबहिनीको हत्या गरेको प्रहरीले जनाएको छ ।

‘अली जेनले सन् २०२२ को जनवरी १९ मा आमा, दुई बहिनी र एक भाइको गोली हानी हत्या गरी पेस्तोल लुकाएका प्रारम्भिक छानबिनले देखाएको छ,’ प्रहरी प्रवक्ताले भनेका छन् ।

पब्जी खेलमा बारम्बार पराजित भएपछि तनावमा परेका उनले खेलमा जस्तै सबै जना फेरि बाँच्न सक्ने सोचेर गोली प्रहार गरेको बताएका प्रहरीको भनाइ छ। प्रहरीले घटनाबारे थप अनुसन्धान भइरहेको जनाएको छ।