काठमाडौं — जापानको हेन ना नामक होटलले मानिसहरूको सुविधाका लागि २४३ वटा रोबोट राखेको थियो । यति धेरै रोबोट राखेको कारण होटलको नाम गिनिज बूक अफ वर्ल्ड रेकर्ड्समा पनि राखिएको छ ।
तर मानिसहरूको गुनासोपछि लगभग १२३ रोबोटलाई जागिरबाट निकालिएको छ । निद्रामा घुर्नेबित्तिकै रोबोटले उनीहरूलाई उठाइदिने गरेको पाइयो ।
होटलमा आएका गेस्टलाई राति अनेकपटक रोबोटले उठाइदिएको रहेछ । अनि रोबोट रिसेप्सनमा बस्दा गेस्टका सामान्य प्रश्नको उत्तर पनि दिन सक्दैनथियो ।
कर्मचारीहरूले ओभरटाइम गरेर रोबोटलाई ठीक गर्नुपरेको थियो । एक स्टाफ मेम्बरले रोबोटका कारण आफूहरूलाई सजिलो भएको किनकि गेस्टका समस्या सुन्नु नपरेको बताए ।
सन् २०१५ मा यो होटल जापानको सासेबोमा खोलिएको थियो । यसले प्रसिद्धि पनि खुबै कमाएको थियो । शुरूआतमा होटलमा ८० रोबोट राखिएको थियो ।
वालस्ट्रीट जर्नलका अनुसार, होटलमा छिट्टै समस्याहरू शुरू भए । एक गेस्टले आफू होटलमा बसुन्जेल आधीभन्दा बढी रोबोट डान्सरले काम नगरेको बताए । अनि रूममा सहायताका लागि तैनाथ गरिएको रोबोटले सामान्य कुराकानी र लाइट एसी अपरेट गर्न समेत सकेनन् ।
एक अन्य गेस्ट योशीहिसा इशीकावाले बताए, ‘रोबोटले मलाई अनेकचोटि निद्राबाट जगायो र सोध्यो – के भन्नुभा, फेरि भन्नू त । मलाई बिहान पो थाहा भयो, घुरेको आवाज सुनेपछि रोबोटको अटो सेन्सरले काम गर्दो रहेछ ।’
होटल मालिक हिदेओ सवादा भन्छन्, ‘रोबोट होटल बनाउने आइडिया मेरो थिएन । अब यसमा केही सुधार ल्याउनुपर्ने देखिएको छ । रोबोट प्रयोग गर्दा गेस्टहरूलाई समस्या आउला भन्ने सोचिएकै थिएन ।’
एजेन्सी
