एटम बम हानेपनि आफूहरु समाप्त नहुने भन्दै बामदेबको गर्जन

दमक/नेकपा एमालेका उपाध्यक्ष तथा पूर्व उपप्रधान एवं गृहमन्त्री वामदेव गौतमले मधेसी मोर्चा नामको विखण्डनकारी तत्वले सामाजिक सद्भाव भड्काउन खोजेको बताएकाछन् । एमालेको सरकार बन्नसाथ राम्रो काम गरेको देखेर बिपक्षिहरुको सातो जाने गरेको बताउदै गौतमले भने–मनमोहन अधिकारीको नेतृत्वको सरकारले राम्रो काम गर्दा नौ महिनामै हटाइयो, माधवकुमार नेपालको सरकारलाई नयाँ नेपाल बनाउने भयो भन्ने डरले हटाइयो, झलनाथ खनालको सरकारलाई सात महिना पनि टिक्न दिइएन, केपी शर्मा ओलीको सरकारलाई नौ महिना पनि काम गर्न दिइएन । अबको चुनावमा जनताले यी सबै कुरा हेरेर बहुमत दिनेछन्, एमालेबाहेक जनताले अरु पार्टीलाई विश्वास गर्ने छैनन् । गौतमले एमालेलाइ पेट्रोलबमले हानेर समाप्त गर्न नसकिने बताउदै एटमबम हानेपनि आफूहरु समाप्त नहुने जनाए । उनले भने–राजविराममा पेट्रोल बम प्रहार गरेर एमालेको नेतृत्वलाई समाप्त पार्न खोजियो । त्यस्तो गर्न चाहनेहरुलाई रोकेवापत प्रहरीहरुलाई कारवाही गरियो । एमालले जनताको मनमा छ । त्यसैले पेट्रोल बम त के एटम बम हाने पनि एमाले समाप्त हुँदैन ।