भारतको मध्यप्रदेशस्थित सीधीमा यात्रुबस नहरमा खस्दा ४२ जनाको मृत्यु भएको छ ।

भारतीय सञ्चारमाध्यम दैनिक भास्करका अनुसार ५४ यात्रु बोकेको बस मंगलवार वाणसागर नहरमा खसेको हो । दुर्घटनामा ६ जनाको सकुशल उद्धार गरिएको छ ।

बस नहरमा खसेपछि पौडी खेलेर ज्यान जोगाएका चालकलाई प्रहरीले नियन्त्रणमा लिएको छ ।

बस सीधीबाट सतना गइरहेका बेला बिहान साढे ७ बजे दुर्घटना भएको हो । दुर्घटनाको ४ घण्टापछि क्रेनको सहायताले बसलाई बाहिर निकालिएको छ । नहरको गहिराइ २०–२२ फीट रहेकाले दुर्घटना दर्दनाक रहेको भारतीय सञ्चारमाध्यमले जनाएका छन् ।

बसमा यात्रा गरिरहेका यात्रुहरू १२ कक्षाका छात्र र रेल्वेको परीक्षा दिन सतना गइरहेकाहरू थिए ।

बसमा ३२ जनाको मात्रै सीट क्षमता भएपनि ५४ यात्रु भरिएको थियो । बस सिधा बाटो छुहियाबाट सतना जानुपर्ने भएपनि ट्राफिक जाम छल्न रुट परिवर्तन गर्दा दर्दनाक घटना भएको छ ।