अन्तराष्ट्रिय

म्यानमार : सेनाकाे विरुद्ध फेरि सडकमा निस्किए प्रदर्शनकारी


  काठमाडाैं   एजेन्सी   २०७७ फाल्गुन २०, १४:५०

काठमाण्डाै – म्यानमारमा गएको बुधवार एकैदिन ३८ प्रदर्शनकारीको ज्यान गएको भोलिपल्ट बिहीवार पनि निकै ठूलो सङ्ख्या प्रदर्शनकारी सडकमा निस्किएका छन् ।

म्यानमारको सबैभन्दा ठूलो सहर याङ्गोनमा प्रदर्शनकारीहरुले सडकमा टायर, तारबारको ब्यारिकेड्स बनाएका छन् । प्रहरीले प्रदर्शनकारीहरूलाई तितरबितर गर्न अशृग्यास र गोली चलाएको बीबीसीले जनाएको छ । यद्यपि अहिलेसम्म कसैलाई पनि क्षति नपुगेको बताइएको छ ।

प्रत्यक्षदर्शीहरूले याङ्गोनका साथै केन्द्रीय सहर मोन्यावामा पनि प्रहरीले प्रदर्शनकारीमाथि गोली चलाएको बताएका छन् । साथै सञ्चारमाध्यममा आइरहेको खबर अनुसार याङ्गोनको पश्चिमतर्फ पर्ने पाथेन सहरमा पनि प्रहरीले गोली चलाएको छ ।

सामाजिक कार्यकर्ता माउङ्ग शाउङ्गकाले समाचार एजेन्सी रोयटर्ससँग भन्नुभएको छ, ‘हामीलाई गोली लाग्न सक्थ्यो र हामी मर्न सक्थ्यौ भने हामीलाई थाहा थियो । तर यसको अर्थ हामी सैन्य शासन स्वीकार गर्छाैँ भन्ने होइन ।’

बुधवार म्यानमारमा भएको विरोध प्रदर्शनमा कम्तीमा ३८ प्रदर्शनकारीको ज्यान गएको थियो र त्यो घटनालाई लिएर संयुक्त राष्ट्र सङ्घले ‘रक्तपातपूर्ण दिन’ भएको थियो ।

संयुक्त राष्ट्र सङ्घको सुरक्षा परिषदमा म्यानमारको सम्बन्धमा शुक्रवार चर्चा हुने बताइएको छ ।

म्यानमारमा गएको फेब्रुअरी १ मा सैन्य कू पछि त्यसको विरोधमा प्रदर्शन भइरहेको छ । चुनावमा धाँधली भएको भन्दै म्यानमारको सेनाले नेतृ आङ सान सुकीसहितका शीर्ष नेताहरूलाई हिरासतमा लिएर सैन्य शासन लागू गरेको छ । म्यानमारमा एक वर्षका लागि सङ्कटकाल घोषणा गरिएको छ ।

नेतृ सुकीसहितका नेताहरुको रिहाइको माग गर्दै पनि विरोध प्रदर्शन भइरहेको छ । सेनाको कदम र प्रदर्शनमा भइरहेको दमनलाई अमेरिका र युरोपेली युनियनसहित विभिन्न देशले आलोचना गरेका छन् ।

फेसबुकमा तपाईको प्रतिक्रिया

सवालनेपालमा प्रकाशित सामग्रीबारे कुनै गुनासो, सूचना तथा सुझाव भए हामीलाई [email protected] मा पठाउनु होला।

फेसबुकमा तपाईको प्रतिक्रिया

Leave a Reply

Your email address will not be published. Required fields are marked *

सम्बन्धित शीर्षकहरु