बीबीसी । तेस्रो लहरको कोरोना संक्रमणको खतरा बढेपछि फ्रान्सको राजधानी पेरिसमा एक महिनाका लागि लकडाउन हुने भएको छ । २ करोड १० लाख नागरिक बसोबास गर्ने १६ क्षेत्रमा शुक्रबार मध्यरातदेखि लकडाउन कार्यन्वयन हुने छ । तर, अहिलेका नियमहरु यसअघिका लकडाउनमा जति कडा नहुने प्रधानमन्त्री जिन केसटेक्सले बताएका छन् । पछिल्लो २४ घण्टामा फ्रान्समा ३५ हजारभन्दा धेरै नयाँ संक्रमितहरु थपिएका छन् । यस्तोमा प्रधानमन्त्री जिनले रोयटर्ससँग कुरा गर्दै अहिलेको फैलावटलाई नियन्त्रण बाहिर जान नदिने आफूहरुको जिम्मेवारी भएको बताएका छन् ।
विशेषगरी पेरिसमा अवस्था चिन्ताजनक भएको बताइएको छ । जहाँ इन्टेसिभ केयरमा १२ सय जनालाई राखिएको छ । गम्भीर बिरामीहरुको यो सङ्ख्या नोभेम्बरको दोस्रो लहरभन्दा धेरै भएको स्वास्थ्य मन्त्री ओलिभिअर भेरानले बताए । यता, गर्मियाम सुरु भएपछि पर्यटकहरुको चहलपहल बढ्ने अपेक्षा गरिरहेका पेरिस क्षेत्रका व्यवसायीहरुमा यसले अधिक नोक्सान पुर्याउनेबारे भने चिन्ता व्यक्त गरिएको छ ।
नयाँ लकडाउन अन्र्तगत अतिआवश्यक बाहेकका सबै कामकाज बन्द गर्न लगाइनेछ तर स्कुलहरु खुला रहने भनिएको छ । नागरिकलाई आफ्नो घरको १० किलोमिटरसम्म एक्सरसाइज गर्न दिइनेछ तर देशका अन्य भूभागमा बिना कुनै विशेष कारण भ्रमण गर्न अनुमति छैन । त्यस्तै प्रभावित क्षेत्रका नागरिकले घर छाड्नु परेमा यसको कारण बताउँदै आवेदन फारम भर्नुपर्ने हुन्छ ।फ्रान्सको देशव्यापी कफ्र्यु भने यथावत रहने बताइएको छ । अबबाट बिहान ७ बजेदेखि सो कफ्र्यु हट्नेछ ।
खोप अभियानमा कमजोर देखिएकाप्रति फ्रान्स सरकार आलोचित भइरहेका बेलामा लकडाउनबारे नयाँ घोषणा गरिएको हो । यसअघि युरोपेली मुलुकहरुमा एस्ट्राजेनेकाको खोप लगाएपछि रगत जम्ने समस्या देखिएका विभिन्न रिपोर्ट आएका थिए । जसपछि फ्रान्ससहित धेरै देशहरुले यसको प्रयोगमा रोक लगाएका हुन् । तर, युरोपेली निरीक्षक इएमएले थप रिसर्चपछि यसलाई पूर्ण सुरक्षित घोषणा गरेको छ । शुक्रबारदेखि नै फ्रान्स्मा पनि देशभर एस्ट्राजेनेका खोपको प्रयोग पुनः सुचारु गरिने मन्त्री जिनले बताए । यसमा कुनै समस्या छैन भन्ने पुष्टि गर्न उनी आफैँले पहिले खोप लगाउने पनि जिनले बताएका हुन् । हालै गरिएको एक सर्वेक्षणमा फ्रान्सका २० प्रतिशत नागरिकले मात्र यस खोपलाई विश्वसनीय मान्ने गरेको पत्ता लागेको थियो ।
प्रतिक्रिया
सम्बन्धित खवर
