नयाँदिल्ली । भारतको उत्तर प्रदेश राज्यस्थित कानपुरका एक व्यापारीको घरबाट एक अर्ब ७७ करोड भारतीय रुपैयाँ बरामद भएको छ । पर्फ्युमसहितका अत्तर ब्यापारी पीयुष जैनको घरबाट सरकारी अधिकारीहरुले एक अर्ब ७७ करोड भारतीय रुपैयाँ बरामद गरेका हुन् ।
सेन्ट्रल ब्यूरो अफ इन्डाइरेक्ट ट्याक्सेस एन्ड कस्टम (सीबीआईसी) र आयकर विभाग (आईटी) का अधिकारी समेत एकै घरमा यति धेरै रकम देखेपछि छक्क परेका छन् । बरामद रकम गन्न १३ वटा मेसिनलाई लगातार ३६ घण्टासम्म लागेको थियो । एक वरिष्ठ अधिकारीले आफ्नो जागिर अवधिमा यति धेरै पैसा कहिले नदेखेको बताएका छन् ।
अर्कातिर कानपुरसँगै जोडिएको कन्नौजमा अत्तर कारोबारसँग जोडिएका रानु मिश्रा र विनीत मिश्राको घरमा पनि छापा हानिएको छ । शुक्रवार मध्यरातिसम्म जैनको घरमा नोट गन्ने काम चलेको थियो । बरामद रकमलाई ४२ ठूला बाकसमा हालेर कन्टेनरबाट पुलिस सुरक्षामा पठाइएको छ ।
पीयुष जैन मूलरूपमा कन्नौजबासी हुन् । कानपुरस्थित उनको घरमा छापा मारेपछि उनका छोरा प्रत्यूषलाई लिएर सरकारी अधिकारी शुक्रवार साँझ कन्नौजस्थित घर पुगे । त्यहाँ पनि दुई कोठाबाट चार करोड बरामद गरिएको छ ।
