राष्ट्रिय सभाका सदस्यका लागि ७ नम्बर प्रदेशमा भएको निर्वाचनसँगै मतगणना पनि सम्पन्न भएको छ । सो प्रदेशमा वाम–गठबन्धनले ६ र कांग्रेसले २ पदका वाजी मारेको छ । प्रदेश–७ मा ६ पदमा यस अघि नै निर्विरोध निर्वाचित भएका थिए भने आज २ पदका लागि मात्रै मतदान भएको थियो । निर्वाचनबाट वाम–गठबन्धनका उम्मेदवार महेशकुमार महरा ‘सुधिर’ र चक्रप्रशाद स्नेही विजयी भएका छन् ।
अपांग तथा अल्पसंख्यकतर्फ माओवादीका महराले ३ हजार ७ सय ८ मतका साथ विजयी भए भने उनका निकटतम प्रतिद्धन्द्धी कांग्रेसका छत्रराज जोशीले १ हजार ९ सय ८ मत प्राप्त गरेका थिए ।
त्यस्तै, दलिततर्फ एमालेका चक्रप्रशाद स्नेही ३ हजार ७ सय ८ मत प्राप्त गरी विजयी भए भने उनको निकटतम प्रतिद्धन्द्धी कांग्रेसका शेरिराम पार्कीले १ हजार ८ सय ९० मत प्राप्त गरेको मुख्य निर्वाचन अधिकृत जयानन्द पनेरुले जानकारी दिए ।
निर्वाचनमा एक मत बदर थियो । गाउँपालिकाबाट निर्वाचित प्रतिनिधि दुई ठाउँमा मतदान गरेका कारण बदर भएको निर्वाचन अधिकृत पनेरुले जानकारी दिए । ८ जना राष्ट्रियसभाका सदस्य मध्ये ७ जनालाई आज नै निर्वाचित प्रमाण पत्र हस्तान्तरण गरिसकेको मूख्य निर्वाचन अधिकृतको कार्यालयले जानकारी दिएको छ । माओवादीबाट निर्वाचित हरिराम चौधरी ‘उत्सव’ले मात्रै प्रमाणपत्र बुझ्न बाँकी रहेको छ ।
निर्विरोध निर्वाचित हुने ६ सांसद
प्रदेश–७ बाट ६ जना राष्ट्रिय सभाकाका लागि निर्विरोध निर्वाचित भएका थिए । निर्विरोध हुनेमा खुल्ला समुहबाट कांग्रेसका बद्रीप्रसाद पाण्डे, एमालेका शेरबहादुर कुँवर र माओवादी केन्द्रका हरिराम चौधरी ‘उत्सव’ रहेका छन् । त्यस्तै, महिला समुहबाट कांग्रेसकी तारादेवी भट्ट, एमालेकी कमलाकुमारी ओली र इन्दु कडरिया रहेका छन् ।
मतदान ९९ प्रतिशत
राष्ट्रिय सभाका सदस्यका लागि प्रदेश ७ मा ९९ प्रतिशत मतदान भएको छ । स्थानीय तहका प्रमुख÷उपप्रमुखले शत् प्रतिशत मतदान गरेका छन् भने प्रदेश सभाका ५१ जनाले मतदान गरे । स्थानीय तहका १ सय ७६ र प्रदेश सभाका सदस्य ५३ जना गरी २ सय २९ जना मतदाता थिए । राष्ट्रिय जनता पार्टी नेपालबाट कैलाली १ बाट निर्वाचित दुई जना सांसदले मतदान नगरेको मुख्य निर्वाचन अधिकृतको कार्यालयले जनाएको छ ।
राजपाका कैलाली १ ‘क’ बाट निर्वाचित कृष्णकुमार चौधरी र समानुपातिक तर्फकी मालती रानाथारुले मतदान नगरेका हुन् । मदतान नगरेको बारे सांसद थारुले भनिन्,‘हाम्रो उम्मेदवार पनि थिएनन्, कुनै दलले भोट पनि मागेनन्, त्यसैले हामीले मतदान गरेनौं ।’
प्रतिक्रिया
सम्बन्धित खवर
