दिव्या आर्य / बीबीसी
एक महिलाले आफ्नो ब्लाउजको बटन खोलिन् र उनको पूरा छाती देखियो । त्यसपछि उनले एक पुरुषसँग यौन सम्बन्ध स्थापित गरिन् र छाती खुल्ला राखेर उनी नजिकै सुतिन् ।
जम्मा ३०–४० सेकेन्डको यो भिडियो ह्वाट्सएपमार्फत भाइरल भयो र ती महिलालाई पोर्न स्टार भन्न थालियो ।
युट्युबमा उक्त सीनबाहेक त्यसको १० सेकेन्डको स–सानो क्लिप अपलोड भए जुन हज्जारौं पटक हेरिसकिएको छ ।
यहाँसम्म कि उक्त भिडियो घुमेर ती नायिकाका आफन्तसम्म पनि आइपुग्यो । यो सार्वजनिक रुपमा बाँडिएको छ भन्ने जानकारी दिन ।
यो पोर्न भिडियो होइन । यो सीन ‘नेटफ्लिक्स’ मा रिलिज भएको सिरिज ‘सेक्रेड गेम्स’ मा एउटा निकै विशेष मोडमा आउँछ ।
सिरिजमा श्रीमानको भूमिकामा नवाजुद्दिन सिद्दिकी र श्रीमतीको भूमिकामा राजश्री देशपान्डेका बीच सम्बन्ध निकै असहज रहन्छ । नवाजुद्दिनको पात्र बेडमा लगभग ‘हिंस्रक’ रुप लिने गर्दछ ।
तर स्थितीमा परिवर्तन आउँछ र दुबैबीच प्रेम पलाउन थाल्छ । यो दृश्यले त्यही परिवर्तन देखाउँछ । यसमा उनीहरु निकै प्रेमपूर्ण तरिकाले एक अर्कासँग नजिक हुन्छन् ।
तर उक्त दृश्यबाट कहानी निकाल्ने हो भने त्यही मात्र बाँकी रहन्छ । खुल्ला छाती र सेक्स ।
‘मलाई लाज लगेन’
राजश्रीको फोनमा, कहानीको सन्दर्भ नबुझी, उनकै त्यो केही सेकेन्डको भिडियो जब आफन्तले पठाए तब उनलाई निकै नराम्रो लाग्यो ।
राजश्री भन्छिन्, ‘मलाई असाध्यै नराम्रो लाग्यो । मलाई लाज लागेन, नराम्रो लाग्यो । म किन लज्जित होऊँ ।’
उनलाई आफ्नो भूमिका र कहानीमा त्यो भूमिकाको यो दृश्यको आवश्यकतामाथि पूर्ण विश्वास थियो ।
विश्वास थियो कि उनले केही गलत गरेकी छैनन् । महिलालाई वस्तु जसरी देखाइएन ।
उनको शरिरको विभिन्न हिस्सामा क्यामरा ‘जूम’ भएन ।
दोहोरो अर्थ लाग्ने भद्दा शब्द भएका गीत प्रयोग गरिएनन् ।
महिलालाई असभ्य चित्रण गरिएन ।
मात्र सिधा तरिकाले श्रीमान् श्रीमतीको प्रेम प्रसंग देखाइयो ।
राजश्री भन्छिन्, ‘मलाई राम्रोसँग थाहा छ, शरिर देखाउने स्वतन्त्रतालाई जिम्मेवार तरिकाले प्रयोग गर्नुपर्छ । मेरो नियत ठिक थियो । मैले केही गलत गरेकी छैन ।’
तर राजश्रीलाई नराम्रो लाग्यो । उनको भिडियोलाई पोर्नको रुपमा हेरिएका कारण मात्र नभई त्यसलाई मानिसहरुबीच साझा गरिएका कारण उनी दुःखी छिन् ।
भाइरल त धेरैकुरा हुन्छन् । कसैले आँखा झिम्काएको पनि भाइरल हुनसक्छ ।
तर यो भिडियो अलग हो । ३०–४० सेकेन्डको सीनको एउटा हिस्सालाई रोकेर त्यसको सानो भिडियो र तस्बिर बनाएर बाँडिदैछ ।
हेर्नेहरुलाई के भन्ने ?
राजश्री भन्छिन्, ‘यदि यस्ता सामग्री तपाईंसम्म आइपुगे तपाईंले त्यसलाई के गर्ने भन्ने सोच्नुपर्छ । प्रविधी एउटा हतियार हो, यसको प्रयोग मार्नका लागि हुनसक्छ र कसैलाई बचाउनका लागि पनि ।
फिल्म र टेलिभिजन सिरियलमा महिलाको शरिरलाई खुल्ला तरिकाले देखाउने गरिन्छ ।
कहिले यो कहानीको लागि आवश्यक हुन्छ त कहिले अनावश्यक रुपमा । तर सधैं यसलाई धेरै नै देखाइन्छ ।
पोर्न जस्तै । सन्दर्भ बिना । इन्टरनेटमा स–साना क्लिपमा काटेर ।
बिडम्बना यो छ कि हेर्नेहरुलाई कसैले पनि प्रश्न गर्दैनन् ।
तर यो हेर्नेहरु, रस लिनेहरु, आनन्द महसुस गर्नेहरु ती महिलालाई पोर्न स्टार मान्न र भन्न अलिकति पनि ढिला गर्दैनन् ।
‘ऐंग्री इंन्डियन गडेसेस’ र ‘एस दुर्गा’ मा अभिनय गरिसकेकी राजश्री देशपान्डे, ठूलो पर्दाको आफ्ना यी भूमिकाजस्तै, वास्तविक जीवनमा पनि चुप लागेर बस्ने जमातमा पर्दिनन् ।
राजश्री भन्छिन्, ‘बोल्न आवश्यक छ, तब मात्र परिवर्तनको आशा राख्न सकिन्छ । पाँचजनाले मात्र आफ्नो सोच परिवर्तन गरे यो ठूलो उपलब्धि हुन्छ ।’
एजेन्सी
