नयाँदिल्ली (एजेन्सी) । भारतको उत्तराखण्ड राज्यको चम्पावत जिल्लामा आइतबार एक दर्दनाक दुर्घटना भएको छ । मलामी गएका ८ जना शव बोकेको पीकअप भ्यान दुर्घटनामा पर्दा ज्यान गुमाउन पुगे ।
भारतीय प्रहरीकाअनुसार भ्यान अनियन्त्रित भएर भीरबाट खसेको थियो । घटनामा ८ जनाको मृत्यु भयो भने अन्य ११ जना गम्भीर घाइते भएका छन् । प्रहरी र एसडीआरएफका जवानहरुले घाइतेको उद्धार गरि नजिकैको अस्पतालमा पुर्याएका थिए ।
चम्पावतका एपी धीरेन्द्र गुजयालले पीकअप भ्यानमा करिब २० जना मानिस सवार रहेको जानकारी दिए । उनीहरुले मिरतोलीबाट शव लिएर अन्तिम संस्कारका लागि गइरहेका थिए ।
यसैक्रममा दिउँसो १२ बजे शवसहितको भ्यान पिथौरागढ रोडमा लिसा डिपो नजिकै दुर्घटनाग्रस्त भएको थियो ।
यो दुर्घटनापछि पुरै गाउँ शोकाकुल बनेको बताइएको छ ।
