चीनमा विवाहसम्बन्धी निकै अनौठो घटना भएको छ ।
बिहे हुन लाग्दा बेहुलाकी आमाले बुहारीको हात हेर्दा पहिला स्तब्ध भइन् अनि पछि बेस्सरी रोइन् ।
जुन जोडीको विवाह हुन लागेको थियो, उनीहरू त भाइबहिनी पो रहेछन् ।
बेहुलाकी आमाले बेहुलीको हातमा बर्थमार्क देखेपछि तत्कालै आफ्नी छोरी भनी चिनिन् ।
घटना चीनको ज्याङ्सु प्रान्तको सुचोमा भएको हो । मार्च ३१ मा यो विवाह हुन लागेको थियो ।
दुलहीको हातको चिह्न देखेपछि दुलाहाकी आमाले सोधखोज गर्दा दुलहीका आमाबुवाले २० वर्षअघि सडकपेटीमा भेटिएकी बालिकालाई धर्मपुत्री बनाएको बताए ।
त्यसपछि दुलही आफूलाई जन्म दिने आमासँग टाँसिएर ग्वाँ ग्वाँ रोइन् र जैविक आमाबुवाको सोधखोज गर्न थालिन् ।
अचम्मको कुरा त यो थाहा पाएपछि पनि बिहे रोकिएन । दुलाहालाई पनि धर्मपुत्र बनाइएको रहेछ । त्यसपछि दुईजनाको बिहेमा कुनै आपत्ति भएन ।
भाग्यको खेल अनौठो हुन्छ । बीस वर्षअघि हराएकी छोरी खोज्दा खोज्दा नसकेपछि हार मानेर बसेका आमाबुवाकी छोरी त बुहारी हुन पो आइपुगिन् । त्यही छोरी हराएपछि उनीहरूले एक टुहुरोलाई धर्मपुत्र बनाएर राखेका थिए ।
