मस्कट । पपुवा न्युगिनी पीएनजी सँगको दोस्रो एकदिवशीय खेलमा नेपालले पहिलो ब्याटिङ गर्ने भएको छ । कप्तान ज्ञानेन्द्र मल्लले टस जितेर ब्याटिङ रोजेका हुन्।

ओमानको अल अमेरात मैदानमा नेपालले पहिलोपटक डे–नाइट एकदिवशीय अन्तर्राराष्ट्रिय खेल खेल्दैछ। विहीबार भएको पहिलो एकदिवशीय अन्तर्राष्ट्रिय खेलेको टिममा तीनजना परिवर्तन भएका छन् ।

भेट्रान ब्याट्सम्यान शरद भेषावकर, आरिफ शेख र पवन सर्राफलाई आजको खेलमा टिममा राखिएको छैन। उनीहरुको स्थानमा करण केसी, विनोद भण्डारी र सुशान भारीले स्थान बनाएका छन्। आइसिसी विश्वकप लिग टु अन्तर्गत नेपालले अमेरिका र ओमान सम्मिलित त्रिदेशीय शृंखला खेल्दैछ ।

त्यसैको तयारीस्वरुप पीएनजीसँग दुई एशदिवशीय खेलको शृंखला खेलिएको हो। शृंखलाअन्तर्गतको पहिलो खेलमा नेपालले २ विकेटको जित हासिल गरेको थियो । मध्यक्रमका ब्याट्सम्यानले आशातीत प्रदर्शन गर्न सकेका थिएनन् । प्रशिक्षक ह्वाटमोरले अपेक्षाकृत प्रदर्शन गर्न नसकेका मध्यक्रमका तीन ब्याट्सम्यानलाई आजको खेलमा आराम दिएका हुन्।