कोरोनाको प्रभावसँगै बन्द भएको बजार विस्तारै पूर्वावस्थामा फर्किने क्रममा छ । कोभिडको प्रभाव कम रहेको बेला बजारलाई चलायमान बनाउन र ग्राहकलाई बजारमा फर्काउन तथा नेपाली उत्पादनलाई बजार प्रदान गर्न फुटवेयर म्यानुफ्याक्चर्स एशोसियसन नेपालले काठमाडौँको भृकुटीमण्डपमा जुत्ता चप्पल मेला आयोजना गरेको छ ।
१०० रुपैयाँदेखि १० हजार रुपैयाँसम्मका नेपाली ब्रान्डका जुत्ता चप्पल उक्त मेलामा राखिएका छन् । १० प्रतिशतदेखि ७० प्रतिशतसम्म छुट प्रदान गरेको उक्त मेलामा नेपाली ब्रान्डहरुमा ६ महिनासम्मको वारेन्टी प्रदान गरेको छ। देशभरी रहेका १५ सय जुत्ता चप्पल उद्योगको प्रतिनिधित्व गर्दै २५ वटा नेपाली कम्पनीको उत्पादन राखिएको आयोजकले जनाएको छ ।
वृद्ध बालक पुरुष महिला सबैलाई हुने सबै साइजका सबै प्रकारका कपडा लेदर रेजिनका जुत्ताहरु उपलब्ध रहेका छन् । ग्राहकहरु स्थलमा आएर सस्तो मूल्यका गुणस्तरीय ब्रान्डका जुत्ताहरु खरिद गरी नेपाली उत्पादनलाई हौसला दिन अनुरोध गरेको छ ।
कार्तिक २६ गतेबाट सुरु भएको यस मेला मंसिर १३ गतेसम्म सञ्चालन हुने पूर्वयोजना रहेको थियो । तर ग्राहकहरूको उत्साहलाई मध्यनजर गर्दै मेला मंसिर १९ सम्म सञ्चालन हुने आयोजकले जनाएको छ।
