सिडिएस एण्ड क्लियरिङ्ग लिमिडेडले पौष महिना भित्रै थप दुई क्लियरिङ्ग बैंक थप्ने भएको छ । कम्पनीले अहिले धितोपत्र कारोबारको राफसाफ एक मात्र ग्लोबल आईएमई बैंक मार्फत गर्दै आइरहेको छ ।
नेट सेटलमेन्टसहितको नयाँ क्लियरिङ बैंक भित्र्याउन लागिएको हो ।
अब क्लियरिङ बैंकको संख्या तीनवटा पुग्नेछ ।
सीडीएस एन्ड क्लियरिङ लिमिटेड सातौं वर्षमा प्रवेश गरेको अवसरमा बिहीबार आयोजित कार्यक्रममा नेपाल स्टक एक्सचेन्जका महाप्रबन्धक सीताराम थपलियाले नेटिङसहितको नयाँ क्लियरिङ बैंक थप्ने कार्य अन्तिम चरणमा पुगेको जानकारी दिए ।
उनले क्लियरिङ बैंकको संख्या सुरुमा तीनवटा पुर्याइने बताए । आवश्यकताका आधारमा अरु पनि थप्दै जाने योजना नेप्सेले बनाएको छ ।
नयाँ क्लियरिङ बैंक थप्न सीडीएस एन्ड क्लियरिङ लिमिटेडले सिस्टममा अपग्रेड गरिरहेको प्रमुख कार्यकारी देव प्रकास गुप्ताले जानकारी दिए ।
“यसको परीक्षणसमेत भइसकेको छ । परीक्षण सफल भइसकेकाले अब केही दिनभित्रै राफसाफ बैंक छनोट प्रक्रिया अगाडि बढाउछौ गुप्ताले भने ।
नेट सेटलमेन्टसहितको क्लियरिङ बैंक आएपछि ब्रोकर कम्पनी वा राफसाफ सदस्यले दिनभर गरेको कारोबारमा खरिदबापत बुझाउनुपर्ने रकम र बिक्री गरेबापत पाउने रकम नेट गणना गरिनेछ । नेटमा आएको हिसाबकिताबका आधारमा राफसाफ सदस्यले पैसा पाउने वा बुझाउने हुन सक्छ । यस्तो प्रणाली आएपछि राफसाफ पारदर्शी र छरितो हुने अपेक्षा गरिएको छ ।
अभौतिक सेयर कारोबार थाल्ने योजनासँगै ६ वर्षअघि सीडीएस एन्ड क्लियरिङ लिमिटेडको स्थापना गरिएको थियो । अहिले डिम्याट प्रणालीमा गएपछि सेयर राफसाफको सबै काम सीडीएसले गर्दै आएको छ ।
सिडिएसले हाल ६० वटा कम्पनीहरुलाई निक्षेप सदस्यता प्रदान गरेको छ । सीडीएससी नेप्सेको सहायक कम्पनी हो ।
