२९ मंसिर । बालिकालाई आर्थिक प्रलोभन देखाई तथा फकाई फुल्याई जबर्जस्ती करणी गरी फरार दुई जनालाई प्रहरीले राजधानीबाट पक्राउ गरेको छ ।

महानगरीय प्रहरीले राजधानीको गोङ्गबु नयाँ बसपार्क र धादिङको गोगनपानीमा भएको दुई छुट्टाछुट्टै करणी घटनामा संलग्न अभियुक्तलाई गोङ्गबुबाट पक्राउ गरेको जनाएको छ ।

टोखा बस्ने एक १२ वर्षीया बालिकालाई एक हजार रुपियाँको प्रलोभन देखाई गोङ्गबुस्थित होटल ग्रिन नेपालमा पुर्‍याई गत आइतबार राति जबर्जस्ती करणी गरी फरार २४ वर्षीय ललित पुनलाई प्रहरीले पक्राउ गरेको छ ।

त्यस्तै, आठवर्षीय बालिकालाई चार वर्षअघि जबर्जस्ती करणी गरी फरार धादिङ गोगनपानीका २३ वर्षीय रामशरण परियार पनि काठमाडौँबाट पक्राउ परेका छन् । घटनापछि फरार परियारविरुद्ध जिल्ला अदालत धादिङले चार वर्ष कैद सजाय सुनाएको थियो । गोरखापत्र दैनिकमा खबर छ ।