काठमाडौं/ कात्तिक मासको शुक्ल पक्षको चतुर्दशी सोमबार २५ गते अर्थात ११ नोभेम्बरमा परेको छ । यसलाई बैकुन्ठ चतुर्दशी पनि भनिन्छ । यो दिन भगवान विष्णु तथा शिवजीको विशेष पूजा गरिन्छ ।
देवशयनी एकादशी अर्थात चतुर्मासको सुरुवातमा भगवान विष्णुले सृष्टिको भार भगवान शिवलाई सुम्पेर आफूले विश्राम लिने धार्मिक मान्यता रहेको छ ।
यो चार महिना सृष्टिको सञ्चालन शिवजीले गर्ने छन् । देवउठनी एकादशीमा भगवान विष्णु जाग्ने र बैकुन्ठ चतुर्दशी तिथिमा भगवान शिवजीले सृष्टिको भार फेरि विष्णुलाई सुम्पने विश्वास गरिन्छ ।
यो दिन शिवजी र विष्णुको विशेष पूजा गरे लाभ मिल्ने धार्मिक विश्वास रहेको छ ।
१. बैकुन्ठ चतुर्दशीमा बिहान तथा साँझ गणेश भगवानको पूजा गर्नुहोस् । यसपछि भगवान विष्णुको प्रतिमा तथा शिव लिङ्गको पूजा गर्नुहोस् । भगवान विष्णुलाई केसर, चन्दन मिसाएको जलले स्नान गर्दिनुहोस् । चन्दन, पहेलो वस्त्र, पहेलो फूल पनि चढाउनुहोस् ।
२. शिव लिङ्गलाई दूध मिसाएको जलले स्नान गरेपछि सेतो फूल, अक्षता, बिल्वपत्र चढाउनुहोस् । दुवै भगवानलाई कमलको फूल अर्पित गर्नुहोस् ।
३. दुवै देउतालाई दूधबाट बनेको मिठाइको भोग लगाउनुहोस् । दीप वा धुप जलाउनुहोस् । आरती गर्नुहोस् । यसका साथै मन्त्रको जाप पनि गर्नुहोस् ।
यसका लागि तपाईंले यी मन्त्र उच्चारण गर्नु भयो भने तपाईंले गरेको प्रार्थना तथा भक्तिभाव अझ प्रभावकारी हुनेछ ।
विष्णु मन्त्र
पद्मनाभोरविन्दाक्ष: पद्मगर्भ: शरीरभूत्। महर्द्धिऋद्धो वृद्धात्मा महाक्षो गरुडध्वज:।।
अतुल: शरभो भीम: समयज्ञो हविर्हरि:। सर्वलक्षणलक्षण्यो लक्ष्मीवान् समितिञ्जय:।।
शिव मन्त्र
वन्दे महेशं सुरसिद्धसेवितं भक्तै: सदा पूजितपादपद्ममम्।
ब्रह्मेन्द्रविष्णुप्रमुखैश्च वन्दितं ध्यायेत्सदा कामदुधं प्रसन्नम्।।
