काठमाडौं- इटालियन शीर्ष डिभिजनको फुटबल लिग सिरी ए मा एसी मिलानले नौ खेलाडीमा समेटिएको बोलोग्नाविरुद्ध ४–२ गोलअन्तरको सहज जित निकालेको छ।
बोलोग्नाकै मैदानमा सम्पन्न खेलमा घरेलु टिमका एड्मा सोउमाओरो र रोबर्टो सोरियनोले रातो कार्ड पाएपछि उनीहरू मैदानबाट बाहिरिएपछि मिलानले सहज जित निकाल्यो। सोउमाओरो खेलको २०औं मिनेटमा बाहिरिएका थिए भने सोरियनो खेलको ५७औं मिनेटमा बाहिरिए।
त्यसबीच खेलको ४८औं मिनेटमा मिलानका फरवार्ड ज्वालटन इब्राहिमोविचले आफ्नै पोस्टमा गोल गरेपछि उनले बोलाग्नालाई गोल कोसेली दिएका थिए।
यता मिलानका राफेल लियोले खेलको १६औं मिनेटमा र गोविडे क्यालाब्रियाले ३५औं मिनेटमा गोल गरेपछि मिलानले २–० गोलको अग्रता बनाएको थियो।
तर, इब्रहिमोविचको आत्मघाती गोलमा बोलोग्नाले पुनरागमन गरेको थियो। यता मुबा बरोले खेलको ५२औं मिनेटमा गोल गरेपछि त खेल २–२ गोलको बराबरीमा आएको थियो।
तर, बोलोग्नाका दुवै खेलाडी बाहिरिएपछि मिलानले २ गोल थप्यो। ८४औं मिनेटमा इसमएल बेन्नासरलो गोल गरे भने अन्तिम मिनेटमा इब्राहिमोविचले गोल गरे।
ती दुई गोलको सहयोगमा मिलानले ४–२ गोलको जित निकाल्यो। यो जितसँगै २५ अंक बनाएको मिलान शीर्षस्थानमा उक्लिएको छ। दोस्रो स्थानको नापोलीको २४ अंक छ। पराजित बोलोग्ना भने १२ अंकका साथ नवौं स्थानमा छ।
