काठमाडौं । एलिना चौहान नेपाली सांगीतिक क्षेत्रमा पछिल्लो समय उदाएकी गायिका हुन् । एलिनाले स्वर भरेका दर्जनौं गीतहरु रुचाइएका छन् ।चलचित्र, आधुनिक तथा स्टेज कार्यक्रममा एलिनाको उच्च माग छ । यो सबै दर्शक-स्रोताको मायाको उपज भएको एलिना बताउँछिन् ।सोमबार साँझ काठमाडौंमा आयोजित कार्यक्रममा सञ्चारकर्मीसँगको कुराकानीका क्रममा उनले आफ्नो प्रतिस्पर्धा अन्य कुनै गायिकासँग नरहेको बताइन् । त्यस्तै आफ्नै सहकर्मी गायिकाहरुले कुरा काटेको विषयमा पनि उनलाई चित्त बुझेको छैन ।
एलिनाले भनिन्, ‘विशेषगरी, मेरो पारिश्रमिकको कुरालाई लिएर अरु केही गायिकाहरुले कुरा काट्ने गरेको सुनेको छु । मैले जति पारिश्रमिकमा पनि गीत गाउँछु, स्टेज कार्यक्रममा पनि सस्तोमा प्रस्तुति दिने गरेको छु भनेर चर्चा भएको सुनेको छु । यस्तो कुराले मलाई दुःख लाग्छ ।’गायिका एलिनाले यस्ता धेरै विषयलाई अहिले बेवास्ता गर्न थालेको बताइन् । ‘यहाँ त खुट्टा तान्ने प्रवृत्ति धेरै छ । यसैले सबै कुराको विषयमा जवाफ दिएर पनि काम छैन ।’
उनले अगाडि भनिन्, ‘मेरो स्वर केही फरक छ । मेरो स्वर नै चाहिने गीत भएको खण्डमा संगीतकारहरुले सम्झिनुहुन्छ । यसैले मेरो प्रतिस्पर्धा अरु गायिकाहरुसँग छैन ।’
