दमक/भुटानी शरणार्थी युवाहरुको फुटबल क्लब फेन्स क्लब अफ विआरसी भुटानले झापाको दमकमा पहिलो पटक ओविसिए चौँथो अन्तराष्ट्रिय फुटबल प्रतियोगिता आयोजना गर्ने भएको छ ।
विगत २५ वर्ष देखि पूर्वी नेपालको झापा र मोरंगमा बसोबास गर्दै आएका भुटानी युवाहरुले यही मंसिर २५ गते देखि प्रतियोगिता आयोजना गर्न गर्ने भएका हुन् ।
आज दमकमा पत्रकार सम्मेलन गर्दै आयोजकले पुस २ गते सम्म हुने प्रतियोगितामा नेपाल, भारत, भुटान र कतारमा स्थापित ८ फुटबल क्लबहरुले सहभागिता जनाउने जानकारी दिएको हो ।
तेश्रो मुलुक पुर्नवासले नेपालबाट विस्तापित हुन लागेका शरणार्थीहरुले शरण दिने नेपालाई सम्झन प्रतियोगिताको आयोजना गर्न लागेको क्लबका अध्यक्ष युवराज सम्पाङ्ग राईले जानकारी दिनुभयो । प्रतियोगितामा प्रथम हुनेले १ लाख २ हजार १६ रुपयाँ प्राप्त गर्नेछ ।
त्यस्तै दोश्रो हुनेले ६२ हजार प्राप्त गर्ने आयोजकले जनाएको छ । प्रतियोगितामा कुल १९ लाख ७७ हजार २ सय रुपयाँ बजेटको अनुमान आयोजकले गरेको छ । प्रतियोगितामा नेपालमानै पहिलो पटक रेफ्रिहरुले बुलुतुथ इयरफोनको प्रयोग गरेर खेल सञ्चालन गर्ने ओविसिएका निर्देशक तथा फिफा अमेरिकाका रेफ्रि जितु बस्नेतले जानकारी दिनुभयो । जसले खेललाई बिवाद रहित बनाउन सहयोग गर्ने उहाँले बताउनुभयो ।
प्रतियोगिताको उद्घाटन युवा तथा खेलकुद मन्त्री दलजित श्रीपाईलीले गर्ने आयोजकले जनाएको छ । खेलको उद्घाटन विश्व मानव अधिकार दिवशको दिन गरिने अध्यक्ष राईले बताउनुभयो । उहाँले भन्नुभयो,‘ हामी शरणार्थीले धेरै दुःख भोगेका छौँ, त्यसैले प्रतियोगिताको उद्घाटन मानव अधिकार दिवशको दिन गरेका हौँ र प्रतियोगिताको समापन भुटानी राष्ट्यि दिवशको दिन गर्ने भएका हौँ’।
