काठमाडौं, २६ वैशाख – उमेर २५ वर्ष । तलब मासिक १५ लाख । सुन्दा अविश्वास लागेपनि भारतको बिहारकी मधुमिता कुमारका लागि यो सपना नभई वास्तविकता हो ।
संसारका ठूला सर्च कम्पनीहरूमध्ये एक गूगलमा मधुमिताले एक करोड ७५ लाख रुपैयाँ वार्षिक तलब पाउने गरी जागिर पाएकी छन् ।
सोमवार मधुमिता गूगलको स्विट्जरल्यान्डस्थित अफिसमा टेक्निकल सोल्युसन इन्जिनियरका रूपमा प्रवेश गरिन् ।
गूगलमा जागिर शुरु गर्नुअघि उनी बेंगलुरुको एपीजी कम्पनीमा काम गरिरहेकी थिइन् ।
उनका पिताका अनुसार, हालै उनलाई अमेजोन, माइक्रोसफ्ट र मर्सिडिज जस्ता कम्पनीबाट पनि अफर आएको थियो ।
अहिले उनका पिता मधुमिताको सफलताको खुशियाली मनाइरहेका छन् ।
पटनानजिकको खगौल इलाकामा बस्ने यो परिवारको चर्चा भइरहेको छ तर कुनै समयमा मधुमिताका पिताले उनलाई इन्जिनियरिङ पढ्न दिन चाहेका थिएनन् ।
सुरेन्द्र कुमार शर्मा भन्छन्, ‘शुरुमा मैले इन्जिनियरिङ क्षेत्र महिलाहरूका लागि हैन भनेको थिएँ । तर मैले युवतीहरू ठूलै संख्यामा यस क्षेत्रमा आइरहेको देखें । अनि मैले उसलाई भर्ना गर न त भनें ।’
त्यसपछि मधुमिताले जयपुरको आर्या कलेज अफ इन्जिनियरिङ एन्ड टेक्नोलोजीबाट कम्प्युटर साइन्समा इन्जिनियरिङको पढाइ गरेकी हुन् ।
यो सफलता हासिल गर्न मधुमिताको मेहनत र लगनशीलताका साथै भारतका पूर्वराष्ट्रपति तथा प्रसिद्ध वैज्ञानिक एपीजे अब्दुल कलामको प्रेरणा पनि सहायक छ ।
बीबीसी हिन्दीबाट
