२४ मंसिर – प्रहरी महानिरीक्षक(आईजीपी) सर्वेन्द्र खनालले कञ्चनपुरकी किशोरी निर्मला पन्तको बलात्कार र हत्याको घटना अनुसन्धान साँघुरिएको बताएका छन् ।
संसदको दीगो विकास तथा सुशासन समितिमा उपस्थित उनले छिटै परिणाम आउने विश्वास व्यक्त गरे । ‘घटनाको अनुसन्धान साँघुरिएको छ । केही समयभित्रै परिणाम आउला’, उनले भने ।
निर्मला प्रकरणमा दोषीको खोजी गरिरहेको प्रहरीले पछिल्लो समय प्रदिप रावल, बिशाल चौधरी र दिनेश चौधरीलार्इ नियन्त्रणमा लिएर अनुसन्धान गरिरहेको छ ।
उनीहरूको डिएनए टेस्ट समेत गरिसकिएको छ । प्रहरी हिरासतमा रहेका उनीहरूसँग केही अघि महानिरीक्षक खनाल आफैँले बयान लिएको विषय सार्वजनिक भएको थियो ।
कञ्चनपुरकी किशोरी निर्मला साउन १० गते बेपत्ता भएकी थिइन् । ११ गते बलात्कार गरी हत्या गरेको अवस्थामा उनको शव फेला परेको थियो। प्रहरीले घटनाका दोषी पत्ता लगाउन सकिरहेको छैन् ।
